Bazalyq mólsherleme jyl sońyna deıin ózgerýi múmkin be
ASTANA. KAZINFORM — Taıaýda jyldyq ınflıatsııa statıstıkalyq mánde qarqyn alýy múmkin. Bul týraly elordada ótken brıfıngide Ulttyq bank tóraǵasy Tımýr Súleımenov málim etti.
- Retteletin tarıfter boıynsha byltyrǵy tómen baza áserinen jyl sońyna qaraı jyldyq ınflıatsııa sál qarqyn alýy múmkin ekenine aıryqsha toqtalǵym keledi. Byltyrǵy qazannan bastap kommýnaldyq tarıfterdi kóterýge moratorıı qoldanylǵanyn eske sala keteıin, onyń aıasynda 2025 jylǵy 4-toqsanda kommýnaldyq tarıfter 14%-ke tómendedi. Sóıtip, «tómen baza» qalyptasty. Bul búgingi baǵany byltyrǵy mándermen salystyrǵanda, statıstıkalyq turǵydan kórsetkishterdiń joǵary ekenin bildiredi. Osylaısha jaqyn aılarda jyldyq ınflıatsııa statıstıkalyq mánde qarqyn alýy múmkin. Alaıda Ulttyq bank retteletin baǵalar reformasynyń tikeleı áserine bazalyq mólsherlemeni kóterýmen jaýap qatpaıdy. Bul rette janama áserler muqııat qadaǵalanyp, olar baıqalǵan jaǵdaıda tıisti sharalar qabyldaımyz. Qazirgi táýekelder balansyn eskersek, bazalyq mólsherlemeni 2026 jyldyń sońyna deıin ózgertý yqtımaldyǵy tómen, - dedi T. Súleımenov.
Osy oraıda ol budan keıingi árbir sheshim makroekonomıkalyq derekter, dezınflıatsııalyq protsesterdiń turaqtylyǵyn baǵalaý, ınflıatsııa dınamıkasy jáne táýekelder balansy negizinde qabyldanatynyn aıtty.
- Biz ustamdy qatań aqsha-kredıt saıasatyn júrgizýdi, janar-jaǵarmaı jáne turǵyn úı-kommýnaldyq sharýashylyq qyzmetteri naryǵyndaǵy jaǵdaıdy, sondaı-aq fıskaldyq jáne kvazıfıskaldyq yntalandyrý aýqymyn baǵalaýdy jalǵastyratyn bolamyz. Aqsha-kredıt saıasatyn júrgizýde saqtyq sharalaryn negizge alamyz. Bizdiń mindetimiz – baǵanyń ósýin ýaqytsha báseńdetý emes, 2027 jyly ınflıatsııany 6,5-8,5% dálizine deıin ornyqty túrde tómendetip, 2028 jyly 5 paıyzdyq maqsattyq deńgeıge jetkizý, - dedi UB basshysy.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
