Bazalyq mólsherleme taǵy tómendeı me – Súleımenovtiń jaýaby
ASTANA. KAZINFORM – Ulttyq bankiniń tóraǵasy Tımýr Súleımenov ınflıatsııa qarqynynyń baıaýlaýyna qatysty pikir bildirip, bul jaǵdaıdyń qarjy retteýshisiniń aldaǵy aqsha-nesıe saıasatyna qalaı áser etetinin aıtty.
- Inflıatsııamen kúres baǵytynda oń nátıjeler jınaldy. Bir kezeńde ınflıatsııa shamamen 30 paıyzǵa deıin jetse, al qazir ol 10 paıyzǵa jaqyndady. Degenmen, biz bul máselege óte saqtyqpen qaraımyz. Inflıatsııany tolyq jeńdik dep keýde qaǵýǵa, sonymen toqtap qalýǵa bolmaıdy, — dedi Tımýr Súleımenov Senattyń jalpy otyrysynan keıin.
Sonymen qatar, ol Ulttyq bank aqsha-nesıe saıasatyn jumsartýǵa múmkindik beretin alǵysharttardyń qalyptasyp kele jatqanyn baıqap otyrǵanyn aıtty. Osyǵan baılanysty sońǵy sheshim barysynda bazalyq mólsherleme 18 paıyzdan 17 paıyzǵa deıin tómendetildi. Osy rette Tımýr Súleımenov bir ýaqytta 1 paıyzdyq tarmaqqa tómendetýdi eleýli qadam dep atady.
— Eger qolaıly jaǵdaılar qalyptasa berse, onda biz bul saıasatty jalǵastyra beretindigimiz sózsiz. Alaıda saq bolǵan jón. Óıtkeni álemde de, elimizdiń ishinde de qubylmaly faktorlar men belgisizdikter áli de jetkilikti, — dep atap ótti Ulttyq bank tóraǵasy.
Aıta keteıik, 5 maýsymda Ulttyq banktiń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 17,00% deńgeıinde belgileý týraly sheshim qabyldaǵan edi.
