Bazalyq mólsherleme ınflıatsııany tejeı ala ma

ALMATY. KAZINFORM – Ótken kúnderi Ulttyq bank bazalyq mólsherlemeni +/- 1 p.t. dálizimen jyldyq 15,25% deńgeıinde qaldyrý týraly sheshim qabyldady.

Qarjy salasynyń sarapshysy Rasýl Rysmambetov Ulttyq bank mańyzdy tańdaý jasaý qajet bolǵanyn atap ótti: bazalyq mólsherlemeni qazirgi deńgeıde qaldyrý nemese ony kóterý. Tramptyń prezıdent saılanýy, tarıfterdiń ósý yqtımaldylyǵy jáne ınflıatsııalyq táýekeldermen baılanysty ekonomıkalyq belgisizdik jaǵdaıynda sarapshy eń ońtaıly qadam – mólsherlemeni 0,25%-ǵa arttyrý bolar edi dep sanaıdy.

- Menińshe, Ulttyq bank qańtar aıynda bolýy múmkin reformalar men kommýnaldyq tarıfterdiń ósýi sekildi yqtımal ekonomıkalyq oqıǵalardy boljaýǵa tyrysyp, osy jyly ınflıatsııalyq dáliz aıasynda qalýǵa umtylyp jatyr. Sondyqtan munyń bárin tejeý kerek, – dedi ol.

Sondaı-aq Rasýl Rysmambetov tarıfterdiń ósýiniń ınflıatsııa men jalpy ekonomıkaǵa áseri týraly pikir bildirdi. Onyń aıtýynsha, eger jylý jáne elektr energııasy sııaqty tarıfter qalypty deńgeıde ósse ári baǵalar naryqqa jaqyn bolsa, ol ınvestıtsııalyq tartymdylyqtyń artýyna yqpal etip, JEO nemese MÓZ sııaqty jańa nysandardy salýǵa ıtermeleýi múmkin. Alaıda ol úshin halyqqa zııan keltirmeıtin durys tepe-teńdikti tabý kerek.

- Ulttyq bank bul jaǵdaıda beıtarap ustanymda, biraq budan ári sheshimder eldegi ahýaldyń qalaı bolatynyna baılanysty. Monetarlyq komıssııanyń kelesi otyrysynda anyqtalady dep úmittenemiz, – dedi sarapshy.

Al ekonomıst Asqar Qysyqov bazalyq mólsherleme ınflıatsııamen kúrestegi róline qaramastan árqashan tıimdi qural bola bermeıtinin aıtty. Onyń pikirinshe, 2015 jyly ınflıatsııalyq targetteý rejımine kóshken sátten bastap Ulttyq banktiń negizgi mandaty – baǵanyń turaqtylyǵy boldy. Alaıda, is júzinde bazalyq mólsherleme ınflıatsııany árdaıym ustap tura bermeıdi.

- Osy jyldar ishinde biz bazalyq mólsherleme ınflıatsııany tejeýge kómektespeıtinin kórip kelemiz. Mólsherleme joǵary bola tura, ınflıatsııa da joǵary deńgeıde qalǵan kezder boldy. Sondyqtan bazalyq mólsherlemeniń ınflıatsııaǵa áseri kóp emes. Birinshiden, paıyzdyq arna tıimdi jumys istemeıdi, óıtkeni nesıe berýdiń aıtarlyqtaı úlesi mólsherlemeniń ózgerýin sezbeıtin tutynýshylyq nesıeler. Mysaly, bankter 30-50 paıyzben nesıe beredi jáne mundaı nesıeler bazalyq mólsherlemeniń ózgerýine baılanbaǵan, – dedi ol.

Ekonomısttiń pikirinshe, qazir bazalyq mólsherleme negizinen depozıttik bazaǵa áser etedi. Joǵary mólsherleme azamattardy depozıtterde aqsha qaldyrýǵa yntalandyrady, bul ekinshi deńgeıdegi bankterdiń ótimdiligin jaqsartady. Bul bankter óz kezeginde qarajatyn Ulttyq bankke ornalastyryp, tabys tabady.

- Bizde bazalyq mólsherleme ınflıatsııamen kúresýdiń quraly emes, teńge baǵamyn qoldaý quralyna aınalyp ketti, – dedi Asqar Kysyqov.

Sarapshy Qazaqstandaǵy ınflıatsııa ótken jyly 8,6%-ǵa jetkenin atap ótti. Aıtýynsha, baǵalardyń ósýine birinshi kezekte tarıfterdiń kóterilýi áser etti. Sýmen qamtamasyz etý, elektr energııasy jáne jylytý tarıfteri 20-30% - ǵa ósti, bul ınflıatsııanyń negizgi sebebi boldy.

- Bazalyq mólsherleme tarıfterge áser etpeıdi. Bıyl bizde tarıfterdiń ósýi, sondaı-aq janar-jaǵarmaı materıaldary baǵasynyń ósýi múmkin. Bazalyq mólsherlemeniń kez kelgen mánine qaramastan, ınflıatsııa ósedi, – dedi Asqar Kysyqov.

Spıker naýryz aıynda Ulttyq bank bazalyq mólsherlemeni kóterý týraly sheshim qabyldaýy múmkin dep boljaıdy.

Eske salaıyq, buǵan deıin Ulttyq bank bazalyq mólsherlemege qatysty málimdeme jasaǵanyn jazǵanbyz.