Bazalyq mólsherleme, munaı baǵasy jáne ınflıatsııamen ne bolady

ASTANA. KAZINFORM — Ulttyq bank sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady.

Brent markaly munaı baǵasy, Qazaqstan ekonomıkasynyń ósimi, ınflıatsııa, bazalyq mólsherleme, taýarlar men qyzmetterdiń eksporty jáne ımporty, sondaı-aq teńge baǵamy – saýalnamanyń negizgi parametri boldy.

Munaı baǵasy jáne ekonomıkanyń ósimi

Munaı baǵasy boıynsha stsenarıı sharttary 2025 jylǵa azdap tómendegenimen, 2026 jáne 2027 jyldarǵa – ósti. Analıtıkter barlyq boljamdy kezeńde munaı baǵasy barrel úshin 68,5-69 AQSh dollary deńgeıinde bolady dep kútedi.

Qazaqstan ekonomıkasynyń ósimine qatysty boljamdar barlyq boljamdy kezeńde birshama jaqsardy. Osylaısha, 2025 jylǵa arnalǵan JІÓ ósimi boıynsha boljam 5%-dan 5,1%-ǵa, 2026 jylǵa – 4,5%-dan 4,6%-ǵa, al 2027 jylǵa – 4,3%-dan 4,5%-ǵa deıin joǵarylady.

Inflıatsııa jáne bazalyq mólsherleme

Inflıatsııa boıynsha analıtıkterdiń boljamy boljamdyq kezeńde ártúrli baǵytta ózgerdi: 2025 jylǵa – medıana 10,7%-dan 11%-ǵa deıin ósti, 2026 jylǵa – 9,4%-dan 9%-ǵa deıin tómendedi, 2027 jylǵa – 6,8%-dan 7%-ǵa deıin ósti.

Respondentter bazalyq mólsherleme 2025 jyldyń sońyna deıin qazirgi deńgeıde saqtalady dep kútedi – medıana 16,3%-dan 16,5%-ǵa deıin ósti. 2026 jylǵa boljamdar 14,5%-dan 14%-ǵa deıin, 2027 jylǵa – 12%-dan 11,8%-ǵa deıin tómendedi.

Saýalnamaǵa Qazaqstanda makroekonomıkalyq kórsetkishterdi taldap, boljaýmen aınalysatyn 16 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar men reıtıngtik agenttikter kiredi. Makroekonomıkalyq saýalnamaǵa qatysýshylar quramy Alatau City Bank Analytics sarapshylarymen tolyqty.

Atap ótetin jaıt, makroekonomıkalyq saýalnamada Ulttyq banktiń boljamdary kórsetilmeıdi. Ol – qazaqstandyq jáne álemdik naryqtaǵy jaǵdaıdyń damýyna qatysty kásibı naryq qatysýshylarynyń táýelsiz pikiri, baǵalaýlary men kútýleriniń jıyntyǵy ǵana.