Bazalyq mólsherleme boıynsha sheshim qabyldaýǵa JI kómektesýi múmkin

ALMATY. KAZINFORM — Qazaqstan Respýblıkasy Ulttyq bankiniń jumysynda jasandy ıntellekti qoldanylady. 

Almatyda ótip jatqan Central Asia Fintech Summit forýmy aıasynda Ulttyq bank tóraǵasy Tımýr Súleımenov jasandy ıntellektiniń ınvestıtsııalyq sheshim qabyldaýda úlken áleýeti bar ekenin atap ótti.

— Árıne, jasandy ıntellekt analıtıkada úlken kómek kórsetýi tıis. Osy maqsatta bizde derekter bazasy bar, óıtkeni aqparatty taldaýǵa jáne JI-di oqytýǵa derekkóz qajet. Áıtpese bul maǵynasyz bolar edi. Menińshe, jetkilikti túrde oqytylyp, derekterdi alǵan JI biz úshin myqty analıtıkalyq qoldaýshy bolmaq, — dedi Ulttyq bank basshysy.

Tımýr Súleımenov «JI bazalyq mólsherlemeni aıqyndaý kezinde qoldanylyp jatyr ma» degen suraqqa jaýap berdi.

— Bazalyq mólsherlemeni aıqyndaý — bul bir mezette ári ǵylym, ári óner. Ǵylym turǵysynan jasandy ıntellekt tamasha nátıje kórsetedi, biraq ǵylym men ónerdi ushtastyrý qalaı bolaryn kóremiz. Sondyqtan ázirge bul sheshimdi tek aqsha-kredıt saıasaty komıtetiniń músheleri qabyldaıdy. Pikirtalas arqyly bul kúrdeli sheshimdi adamdar qabyldaıdy, — dedi spıker.

Tımýr Súleımenov bolashaqta Ulttyq banktiń analıtıkalyq jumysyna kómektesetin JI keńesshisi paıda bolatynyn rastady.

— Iá, bastapqyda bizde «tóraǵanyń tsıfrlyq orynbasaryn» qosý týraly oı boldy, biraq olaı alysqa barmaýdy uıǵardyq. Sondyqtan bizde tsıfrlyq qarjylyq analıtık bolady, ol óz táýelsiz pikirin belsendi túrde bildirip otyrady. Biz oǵan daýys berý quqyǵyn bergimiz kelmeıdi, bul jerde quqyqtyq aspektiler bar, — dedi Ulttyq bank basshysy.

Eske salaıyq, buǵan deıin Ulttyq bank basshysy elimizde onlaın tólemniń úlesi 90 paıyz ekenin aıtty.