Baızaqtaǵy jarylysta joǵalyp ketken sarbazdy áli izdep jatyrmyz – mınıstr

NUR-SULTAN. QazAqparat – QR Qorǵanys mınıstri Rýslan Jaqsylyqov Baızaqtaǵy jarylysta iz-túzsiz joǵalǵan áskerı qyzmetshi týraly pikir bildirdi, dep habarlaıdy QazAqparat.

«Men onyń ata-anasymen kezdestim. Qys mezgilinde aýa-raıynyń qolaısyzdyǵyna baılanysty izdeýdi ýaqytsha toqtattyq. Biz qazir ýtılızatsııa jumystaryn bastadyq. Sáıkesinshe osy áskerı qyzmetshiniń súıegin dep aıtqym kelmeıdi, jalpy izdestirý jumystary jalǵasýda. Ol tipti jarylystyń epıtsentrinde bolsa da, eshteńe qalmaýy múmkin emes qoı. Qandaı da bir nátıje shyqsa, habarlaımyz», - dedi R. Jaqsylyqov Májilis otyrysynan keıin tilshilerge bergen suhbatynda.

Mınıstr qazir ýaqyt pen merzim týraly aıtý qıyn ekenin jetkizdi.

«Sebebi onda áli de kóp jumys júrgizý kerek. Onyń otbasyn da túsinemin. Biz olarǵa habar-osharsyz mert boldy dep tanýdy usyndyq, sonda áleýmettik tólemder de, Qarýly Kúshter tarapynan tólemder bolar edi. Biraq otbasyn da jaqsy túsinemiz jáne izdeýdi jalǵastyramyz. Іzdeý jumystaryn bizben qatar ishki ister organdary da júrgizip jatyr», - dedi R. Jaqsylyqov.

Eske sala ketsek, 26 tamyz kúni Jambyl oblysynyń Baızaq aýdanynda oq-dári qoımasynan órt shyǵyp, artynan jarylǵany habarlanǵan bolatyn.

Oqıǵa saldarynan barlyǵy 17 adam qaza tapty. Olardyń arasynda ishki ister organynyń qyzmetkerleri, áskerıler men tótenshe jaǵdaılar qyzmetiniń ókilderi, áskerı prokýror bar. Sondaı-aq áskerı qyzmetshi Baýyrjan Dáýitbaev joǵalyp, onyń izdestirilip jatqany jarııalandy.