Baızaq aýdanyndaǵy áskerı bólimde jarylystan qaza tapqandarǵa arnalyp eskertkish qoıyldy

NUR-SULTAN. QazAqparat - 26 tamyzda Jambyl oblysy Baızaq aýdanyndaǵy áskerı bólim aýmaǵyndaǵy órt saldarynan bolǵan qaıǵyly oqıǵaǵa bir jyl tolyp otyr., dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Áskerı bólim aýmaǵynda ınjenerlik oq-dáriler qoımasynda jarylys saldarynan qaza bolǵan 17 adamdy eske alýǵa arnalǵan eskertkish ashyldy.

Atalǵan memorıaldyń ashylý rásimine «Ońtústik» óńirlik qolbasshylyǵynyń basshylyǵy, Jambyl oblysy ákimdiginiń, ońtústik óńirdiń áskerı prokýratýrasynyń ókilderi, sondaı-aq qaıǵyly oqıǵa saldarynan qaza tapqan áskerı qyzmetshilerdiń jaqyndary men týystary qatysty.

Rásimge jınalǵandar qaza bolǵandardy bir mınýt únsiz turyp eske aldy. Kúshtik qurylymdardyń ókilderi, qyzmettesteri, týystary men jaqyndary qaza tapqandar týraly estelikterin aıtyp, olardyń janqııar batyrlyǵy jaıly sóz etti.

«Ońtústik» óńirlik qolbasshylyǵynyń áskerı qyzmetshileri, Tótenshe jaǵdaılar departamenti órt sóndirý qyzmetiniń qyzmetkerleri jáne áskerı prokýratýra qyzmetkerleri, olardyń bári ózderiniń kásibı mindetterin adal, janqııarlyqpen atqardy», – dep atap ótti Jambyl oblysy ákiminiń orynbasary Erkin Úısimbaev.

«Áskerı qyzmetkerlerdiń, jerlesterimizdiń qazasy orny tolmas aýyr qaıǵy. Biz olardyń otbasylaryna qamqorlyq jasap, nazardan tys qaldyrmaı, balalarynyń ákelerin maqtan tutyp ósýine kómektese beremiz. Mundaı oqıǵa endi eshqashan bolmasyn dep tileımiz»,-dedi.

2021 jylǵy 26 tamyzda Baızaq aýdanyndaǵy ınjenerlik oq-dáriler qoımasy aýmaǵynda bolǵan oqıǵa saldarynan óziniń kásibı jáne áskerı boryshyn óteý kezinde 17 adam qaıǵyly jaǵdaıda qaza tapty. Marqumdardyń bári memlekettik nagradalarmen marapattaldy. Bir áskerı qyzmetshi – 28349 áskerı bólimi órt sóndirý bóliminiń komandıri kishi serjant Baýyrjan Dáýitbaev áli kúnge deıin habar-osharsyz.

«Olardyń esimderi árqashan jadymyzda saqtalyp, jasaǵan erlikteri Otanǵa adal qyzmet etýdiń jáne óz isine adaldyqtyń úlgisi. Biz qaza tapqandardyń otbasylarymen baılanysty úzbeı, kómek kórsetemiz. Al eger balalary áskerı oqý oryndaryna túsýge nıet bildirip jatsa, biz olarǵa daıarlyqta jan-jaqty járdem kórsetetin bolamyz», – dep atap ótti áskerı bólim komandıri podpolkovnık Erkin Ábsadyqov.

Qazirgi ýaqytta áskerı bólim aýmaǵyn oq-dárilerdiń qaldyqtarynan tazartý jumystary jalǵasýda. Olardy joıý eldi mekenderden alys ornalasqan taýly jerde júrgiziledi.