«Báıterektiń» 12,6 paıyzdyq nesıesi ınflıatsııany arttyrmaıdy – Azamat Ámrın

ASTANA. KAZINFORM – Ulttyq ekonomıka mınıstriniń orynbasary Azamat Ámrın «Báıterek» ulttyq basqarý holdıngi arqyly bızneske 12,6 paıyz mólsherlememen beriletin 8 trln teńge ınflıatsııaǵa qalaı áser etetinin aıtty.

- Otyrysta «Báıterek» arqyly bızneske 12,6 paıyz mólsherlememen 8 trln teńge bólinetini aıtyldy. Bul osynsha mólsherdegi qomaqty soma Ulttyq bank bekitken bazalyq mólsherlemeden tómen paıyzben ekonomıkaǵa túsedi degen sóz. Mundaı qadam Ulttyq banktiń bazalyq mólsherleme (16,5 paıyz – red.) arqyly ınflıatsııany tejeýge baǵyttalǵan búkil eńbegin joqqa shyǵarmaı ma, - dep surady jýrnalıst.

Vıtse-mınıstr bul aqsha taýar naryǵyna emes, naqty óndiriske bólinetindikten ınflıatsııaǵa áseri bolmaıtynyn jetkizdi.

- Ol olaı emes. Bazalyq mólsherlemeni arttyrý nege ınflıatsııany tejeıdi? Óıtkeni ol shynymen de ekonomıkadaǵy aqshany azaıtady. Al «Báıterekten» ekinshi deńgeıli bankter arqyly bóletin aqsha naqty nysandarǵa, naqty taýarlardyń óndirisine baǵyttalady. Inflıatsııa bolý úshin aqshanyń kólemi taýar kóleminen artyp ketý kerek. Biz bul aqshany arzandatylǵan nesıe retinde naryqtaǵy taýar kólemin arttyrýǵa ǵana bólgeli otyrmyz. Osylaısha ol da ınflıatsııaǵa keri áser etedi,-dedi Azamat Ámrın.

Aıta keteıik, Úkimet úıindegi Parlament palatalarynyń birlesken otyrysynda Premer-mınıstr Oljas Bektenov «Báıterek» ulttyq basqarý holdıngi arqyly bızneske 12,6 paıyzben 8 trln nesıe bólinetinin aıtty.