«Báıterek» zymyrandy- ǵarysh keshenin salýǵa qatysty Reseımen jasalǵan kelisimge qosymsha qajet - T.Musabaev
TANA. 19 qyrkúıek. QazAqparat /Aıdar Ospanalıev/ - Qazaqstan Reseı tarapynan «Baıqońyr» ǵarysh aılaǵynyń bazasynan «Báıterek» zymyrandy-ǵarysh keshenin salý sharasynyń merzimi men onyń baǵasyn naqtylaýdy surap otyr.
Bul týraly búgin Parlament Májilisinde ótken Úkimet saǵatynda Ulttyq ǵarysh agenttiginiń tóraǵasy talǵat Musabaev málim etti.
Onyń sózine qaraǵanda, atalmysh keshenniń baǵasy ony jobalaǵan kezdegiden 5 esege artyp ketken. «Atalmysh keshen boıynsha qazir negizinen jobalaý jumystary aıaqtaldy. Bul óte úlken jumys. Ony arnaıy mamandardan basqalar bile bermeıdi. Al endi osy jumysty aıaǵyna deıin jetkizetin bolsaq, bizge qazir saıası sheshim qabyldaý qajet. Bul sheshim «Báıterek» zymyrandy-ǵarysh keshenniń merzimi men baǵasyna baılanysty bolmaq jáne sheshim óte joǵary deńgeıde qabyldanýy kerek»,-dedi Agenttik tóraǵasy.
Onyń sózine qaraǵanda, Qazaqstan men Reseı arasyndaǵy «Báıterek» zymyrandy-ǵarysh keshenin salý jónindegi kelisim 2004 jyly jasalǵan. Alaıda onda keshendi saldyń merzimi kórsetilmegen. «Osyǵan baılanysty biz atalǵan kelisimge qosymsha jasaý qajet degen máseleni eki jyldan beri talqylap kelemiz. Eger osy kelisim jasalatyn bolsa, onda keshendi salý merzimi men onyń qunyna jáne Reseı tarapynyń alatyn jaýapkershiligine qatysty barlyq máseleler qamtylady. Kelisim Qazaqstan úshin ekonomıkalyq jáne saıası táýekelderdi jeńildetedi»,-dedi T.Musabaev.
