«Báıterek» jáne «QazAgro» holdıngteri qosylý týraly shartqa qol qoıdy
«Báıterek» UBH» AQ-dan málim etkendeı, tapsyrý aktisin bıylǵy jyldyń 15 naýryzynda bekitý kózdelgen.
«Qazaqstan Táýelsizdiginiń 30 jyldyq mereıtoıy atap ótiletin, elimiz úshin asa mańyzdy jyly «Báıterek» holdıngi jańa fýnktsııalarmen tolyqqan qýatty, tutas memlekettik holdıng retinde óz jumysyn jalǵastyrady.
Bizdiń aldymyzda úlken mindetter tur. Holdıng iske asyratyn memlekettik baǵdarlamalardyń sany artýda. Aldyńǵy kezekte – agroónerkásiptik keshendi damytýdyń memlekettik baǵdarlamasy. Bizdiń mindetimiz – qosylý protsesin fermerlerimiz asa sezinbeıtindeı etip, barynsha aýyrtpalyqsyz ótkizý. «QazAgronyń» aldynda turǵan barlyq mindetter, onyń ishinde kóktemgi egis jumystary, mal sharýashylyǵyn, ósimdik sharýashylyǵyn qoldaý jáne taǵy basqalar bizge ótip, nazardan tys qalmaıdy. Jumys tıimdi ári sapaly bolý úshin bar kúshimizdi salamyz», - dedi Aıdar Áriphanov.
Esterińizge sala keteıik, Memleket basshysynyń 2020 jylǵy 1 qyrkúıektegi Qazaqstan halqyna Joldaýyn iske asyrý aıasynda «Báıterek» holdıngi men «QazAgro» holdıngin qosý jolymen biryńǵaı damý ınstıtýtyn qurý jumystary júrgizilýde. Sondaı-aq, portfeldik kompanııalar 14-ten 7-ge deıin qysqartylyp, shtat sany tıisinshe túzetiletin bolady.
Qazirgi ýaqytta qaıta uıymdastyrý boıynsha barlyq qajetti korporatıvtik sheshimder qabyldandy, «QazAgro» holdınginiń aktıvterin túgendeý jumysy aıaqtaldy.
«Báıterek» ulttyq basqarýshy holdıngi» AQ Qazaqstan Respýblıkasy Prezıdentiniń 2013 jylǵy 22 mamyrdaǵy Jarlyǵyna sáıkes quryldy. Ozyq korporatıvtik basqarý standarttaryna sáıkes keletin jáne ártaraptandyrý, jańashyldyqty qoldaý, eksportty damytý, eńbek ónimdiligin ulǵaıtý jolymen Qazaqstan ekonomıkasyn turaqty damytý mindetterin iske asyrýdy qamtamasyz etetin QR Úkimetiniń basty ınstıtýty.