«Báıterek» Ulttyq holdınginiń enshiles mekemelerinde qysqartý júrgiziledi
ASTANA. 6 qarasha. QazAqparat - Aǵymdaǵy jyldyń sońyna deıin «Báıterek» Ulttyq basqarý holdıngi» AQ quramyna enetin damý ınstıtýttary qyzmetkerleriniń shtat sany 5 paıyzǵa qysqartylatyn bolady, dep habarlady holdıng apparatynyń basshysy Erlan Aıtalıev.
Onyń sózine qaraǵanda, qysqartýlar holdıngtiń enshiles uıymdarynyń qyzmetin ońtaılandyrý sheńberinde ótýde. «Áńgime jappaı qysqartý týraly aıtylyp otyrǵan joq. Kadrlyq quram saraptamadan ótkizildi. Maqsatty túrde qysqartylýy tıis shtat birlikteri anyqtaldy», - dep túsindirdi E.Aıtalıev.
Ulttyq holdıng apparatynyń basshysy atap ótkendeı, shtatty qysqartý kelesi jyly da jalǵasady. «2014 jyly biz holdıngtiń enshiles qurylymdary shyǵyndaryn ońtaılandyrý jónindegi sharalardy jalǵastyramyz. Bizdiń aldymyzda damý ınstıtýttarynyń tıimdiligin arttyrý mindeti tur. Biz sol ispen aınalysýdamyz», - dep jalǵastyrdy apparat basshysy.
«Báıterek» UBH» AQ QR Prezıdentiniń 2013 jylǵy 22 mamyrdaǵy jarlyǵyna sáıkes quryldy. Holdıngtiń senimdi basqarý júıesinde «Qazaqstannyń damý banki» AQ, «Qazaqstannyń ınvestıtsııalyq qory» AQ, «Turǵynúıqurylysjınaqbanki» AQ, «Qazaqstan ıpotekalyq kompanııasy» AQ, «QazEksportGarant» AQ, «Damý» kásipkerlikti damytý qory» AQ, «Tehnologııalyq damý jónindegi ulttyq agenttik» AQ, «Qazaqstan ıpotekalyq nesıege kepildik berý qory» AQ, «KazynaCapitalManagement» AQ jáne «Strestik aktıvter qory» AQ sııaqty memlekettik qarjylyq ınstıtýttar bar.
