«Báıterek» ulttyq holdınginiń 2 basqarýshy dırektory qysqartylmaq

NUR-SULTAN. QazAqparat – Búgin Premer-Mınıstr Álıhan Smaıylovtyń tóraǵalyǵymen «Báıterek» ulttyq basqarýshy holdıngi» AQ Dırektorlar keńesiniń otyrysy ótip, birqatar sheshimder qabyldandy. Olardyń qatarynda Basqarma quramyn ońtaılandyrý máselesi de bar, dep habarlaıdy QazAqparat Holdıngtiń baspasóz qyzmetine silteme jasap.

«Otyrys barysynda Keńes músheleri Holdıngtiń Jarǵysyna engiziletin ózgeristerdi qarastyryp, 2021 jylǵy jyldyq qarjylyq eseptilikti (shoǵyrlandyrylǵan jáne jeke) aldyn ala bekitti. Dırektorlar keńesiniń sheshimi boıynsha Holdıng Basqarmasynyń quramy 7 adamnan 5 adamǵa ońtaılandyryldy. Basqarýshy dırektorlar laýazymdaryn atqaratyn Basqarma músheleriniń 2 birligi qysqartylmaq», - delingen málimdemede.

Sondaı-aq, Sybaılas jemqorlyqqa qarsy is-qımyl saıasatyna sáıkes ázirlengen jáne Holdıngtiń Sybaılas jemqorlyqqa qarsy komplaens qyzmetiniń jumysyn jetildirýdi kózdeıtin 2022 jylǵa arnalǵan sybaılas jemqorlyqqa qarsy komplaens baǵdarlamasy bekitildi.

«Aıta keteıik, «Báıterek» holdınginde 2022 jyldyń 1 qańtarynan bastap Dırektorlar keńesine baǵynatyn Sybaılas jemqorlyqqa qarsy komplaens qyzmeti jumys isteıdi», - dep tolyqtyrady baspasóz qyzmeti.

Budan basqa, otyrysta 2022 jyldyń birinshi toqsany boıynsha táýekelder jónindegi esebi, Іshki aýdıt qyzmetiniń esebi, 2021 jyly Korporatıvtik basqarý kodeksiniń qaǵıdattary men erejelerin saqtaýy týraly esebi bekitildi.