«Báıterek» ulttyq ınvestıtsııalyq holdıngi Gonkongtiń iskerlik delegatsııasymen kezdesý ótkizdi
ASTANA. KAZINFORM – Jıyn Qytaı Halyq Respýblıkasynyń Gonkong arnaıy ákimshilik aýdany basshysy Djon Lıdiń elimizge sapary aıasynda uıymdastyryldy.
Basqosýda ınvestıtsııalyq yntymaqtastyq, birlesken jobalardy damytý jáne ekonomıkanyń basym salalaryn qarjylandyrý boıynsha seriktestik máseleleri talqylandy.
Іs-shara shymyldyǵyn «Báıterek» ulttyq ınvestıtsııalyq holdıngi» AQ basqarma tóraǵasy Rýstam Qaraǵoıshın ashyp, kompanııany jáne onyń memleket ekonomıkasyndaǵy rólin tanystyrdy.
– 2025 jyldyń qorytyndysy boıynsha, holdıngtiń jalpy aktıvteri 40 mlrd AQSh dollary boldy. Ótken jyly «Báıterek» el ekonomıkasyna 21 mlrd AQSh dollarynan astam qarjy saldy. Kompanııa júzden astam iri jobany qarjylandyrdy. Sondaı-aq, myńdaǵan shaǵyn jáne orta bıznes sýbektisi men aýyl sharýashylyǵy óndirýshilerine qoldaý bildirdi, – dedi ol.
Al Gonkong tarapynan kezdesýge Gonkongtyń aldyńǵy qatarly 70 kompanııasynyń basshylary jáne materıktik Qytaıdyń 17 provıntsııasyndaǵy kásiporyndardyń ókilderi qatysty. Atap aıtqanda qarjy, logıstıka, ınnovatsııalyq tehnologııalar, jasyl energetıka, taý-ken isi, bıofarmatsevtıka jáne medıa salasynyń mamandary keldi.
Gonkong arnaıy ákimshilik aýdanynyń basshysy Djon Lı óz sózinde ınvestıtsııa eki jaqqa da tıimdi ekenin atap ótti.
– Tórt jyl buryn qyzmetke kiriskenimde, men Gonkongtyń alǵashqy ınvestıtsııalyq korporatsııasyn qurdym. Ol jemisti, nátıjeli jumys istep keledi. Biraq Gonkong ınvestıtsııalyq korporatsııasynyń maqsaty tek qosymsha paıda tabý ǵana emes, biz kompanııa Gonkongtyń uzaq merzimdi damýy úshin mańyzdy óndiris salalaryn órkendetkenin qalaımyz, – dedi ol.
Al Gonkong áýejaılary basqarmasynyń basshysy Fred Lam Qazaqstannyń tranzıttik áleýetine toqtaldy.
– Biz Qazaqstandaǵy áriptesterimizben seriktestikti kúsheıtkimiz keledi. Óıtkeni Qazaqstan óte tıimdi jerde ornalasqan. Eýropa men Azııa arasynda, ásirese, áýe júk tasymalynda zor artyqshylyǵy bar, – dedi ol.
Kelissózder nátıjesinde «Báıterek» UIH» AQ Bank of China (Hong Kong) Limited jáne Invest Hong Kong kompanııalarymen memorandýmǵa qol qoıdy.
Aıta keteıik, Gonkong arnaıy ákimshilik aýdanynyń basshysy Qazaqstanǵa tarıhta alǵash ret kelip otyr.
Al Qazaqstan men Gonkong arasyndaǵy taýar aınalymy byltyr 178,8 mln AQSh dollaryna jetken. Gonkong 2005 jyldan beri elimizdiń ekonomıkasyna 3,9 mlrd AQSh dollary kóleminde ınvestıtsııa quıǵan.
Eske salaıyq, buǵan deıin Qazaqstan men Gonkong birlesken jobalar men tikeleı áýe qatynasyn iske qosýdy qarastyrǵanyn jazǵanbyz.
