«Báıterek» turǵyn úı qurylysyna kepildik berý tetigin iske qosty
ASTANA. QazAqparat - Búgin «Báıterek» ulttyq basqarýshy holdıngi» AQ enshiles uıymy «Turǵyn úı qurylysyna kepildik berý qory» AQ Qorynyń kepildigin alý úshin qurylys salýshylardan ótinim qabyldaýdy resmı túrde bastaıdy.
Jańa «Turǵyn úı qurylysyna úlestik qatysý týraly zańǵa» sáıkes Qor turǵyn úıler qurylysyn aıaqtaý úshin úleskerlerge kepildik beretin bolady. Qordy qurýdyń maqsaty turǵyn úı qurylysyna úlestik qatysýdy kepildendirýdiń turaqty jáne tıimdi júıesin, kepildik berý jaǵdaıy týyndaǵanda úleskerlerdiń quqyqtary men zańdy múddelerin qorǵaýdy, sondaı-aq úlestik turǵyn úı qurylysy naryǵyn yntalandyrýdy qamtamasyz etý bolyp tabylady.
Jańa tetik boıynsha kepildik berý jaǵdaılary mynalar bolyp tabylady: turǵyn úılerdi paıdalanýǵa berý merziminiń buzylýy; aqshany orynsyz paıdalaný; sot sheshimi boıynsha qurylys salýshynyń dármensizdigi.
Bastapqy kezeńde Holdıngtiń enshiles uıymy «Turǵyn úı qurylysyna kepildik berý qory» qurylys salýshynyń ótinimin qaraý kezinde, onyń jańa zań talaptaryna sáıkes kelýin tekseredi. Barlyq talaptarǵa sáıkes kelgen jaǵdaıda, Qor qurylys salýshymen jáne Ýákiletti kompanııamen kepildik berý týraly shart jasasady. Qor odan keıin salynyp jatqan turǵyn úı sapasyn baqylaıtyn táýelsiz ınjınırıngtik kompanııany tarta otyryp, úleskerler aqshasynyń oryndy jumsalýyn, sondaı-aq paıdalanýǵa engizilgen turǵyn úıdiń sapasyn baqylaýdy júzege asyrady, dep habarlaıdy «Báıterek» ulttyq basqarýshy holdıngi» AQ baspasóz qyzmeti.
Jalpy, turǵyn úı qurylysyna kepildik berý tetigin iske asyrý úleskerler úshin de, ınvestorlar úshin de qurylys salasynyń ınvestıtsııalyq tartymdylyǵyn qamtamasyz etedi, sonymen birge qurylys salasynyń ashyqtyǵy men qurylys salýshynyń jaýapkershiligin joǵarylatady.
«Báıterek» ulttyq basqarýshy holdıngi» AQ Qazaqstan Respýblıkasy Prezıdentiniń 2013 jylǵy 22 mamyrdaǵy Jarlyǵyna sáıkes quryldy. Holdıngti qurýdyń maqsaty ekonomıkany damytý men ártaraptandyrýǵa járdemdesý, ınvestıtsııalar tartý, klasterlerdi damytý jáne onyń enshiles uıymdarynda korporatıvtik basqarý júıesin jetildirý bolyp tabylady. Holdıng quramyna mynadaı kompanııalar kiredi: «Kazaqstannyń Damý Banki» AQ, «Qazaqstannyń ınvestıtsııalyq qory» AQ, «Qazaqstannyń turǵyn úı qurylys jınaq banki» AQ, «Qazaqstandyq ıpotekalyq kompanııa» AQ, «QazEksportGarant» AQ, «Damý» kásipkerlikti damytý qory» AQ, «Tehnologııalyq damý jónindegi ulttyq agenttik» AQ, «Qazaqstannyń ıpotekalyq kredıtterge kepildik berý qory» AQ, «Qazyna Kapıtal Menedjment» AQ, «Báıterek development» AQ, «Kazakhstan Project Preparation Fund» JShS. Holdıng osy kompanııalardyń memlekettik aktsııalar paketin ıemdený jáne paıdalaný quqyǵyna ıe.
