«Báıterek» ónerkásip salasyndaǵy jobalardy 120 mlrd dollar somasyna deıin qarjylandyrmaq
ASTANA. KAZINFORM – «Báıterek» holdıngi 2030 jylǵa deıin ónerkásip salasyndaǵy jobalardy 120 mlrd dollar somasyna deıin qarjylandyrmaq. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
– 2026 jyly «Báıterek» ulttyq ınvestıtsııalyq holdıngin 1 trln teńgege deıin kapıtaldandyrý kózdelgen. Qorlandyrýdy eskere otyryp, ekonomıkanyń naqty sektory shamamen 8 trln teńge kóleminde qoldaý sharalarymen qamtylady. Osylaısha, «Báıterek» holdınginiń enshiles uıymdary 2030 jylǵa deıingi kezeńde ónerkásip salasyndaǵy perspektıvaly ári nesıege qabiletti jobalardy shamamen 100–120 mlrd AQSh dollary somasynda qarjylandyrýdy qamtamasyz ete otyryp, joǵary belsendilik tanytatyn bolady, - dedi vıtse-premer.
Onyń aıtýynsha, ekonomıkalyq ósimniń proaktıvti saıasaty Memleket basshysy qoıǵan strategııalyq mindetterdiń oryndalýyn qamtamasyz ete otyryp, Qazaqstan ekonomıkasyn ındýstrııalandyrý men ártaraptandyrýdyń negizgi quralyna aınalady.
– Qazirgi ýaqytta salalyq memlekettik organdar jetekshilik etetin segmentterdi damytýdyń strategııalyq josparlaryn qalyptastyrý boıynsha jumys júrgizip jatyr. Bul josparlar aldaǵy 5 jyl ishinde segmentterdiń jalpy qosylǵan qunyn barynsha arttyrýǵa múmkindik beretin úzdik jobalardyń tizbesin qamtıdy. Іriktelgen jobalar keıinnen salalardy damytý strategııalarynyń negizine aınalady. Atalǵan strategııalar naqty ónimder men jobalardy, ınvestıtsııalar kólemin, jyldar boıynsha óndiris kólemin jáne ózge de mańyzdy aqparatty qamtıdy, - dedi Serik Jumanǵarın.
Buǵan deıin ekonomıkalyq ósimniń proaktıvti saıasatyn engizý boıynsha jumys júrgizilip jatqanyn jazǵan edik.