«Báıterek» monýmentiniń 150 myńynshy qonaǵy - Túmennen kelgen sáýletshi
ASTANA. QazAqparat - Astananyń bas sımvoly adamdardyń kelýi boıynsha rekord ornatty, dep habarlandy elorda ákimdiginiń medıa ortalyǵy.
Túmennen kelgen sáýletshi Elena Mıhaılova «Báıterek» monýmentiniń 150 myńynshy qonaǵy atandy.
Esterińizge sala keteıik, «Báıterek» monýmenti kúrdeli jóndeýden keıin 17 maýsymda qaıta ashylǵan bolatyn. Elordanyń jańartylǵan sımvoly tek qazaqstandyqtardyń ǵana emes, sondaı-aq týrısterdiń de qyzyǵa baratyn jerine aınaldy. Tańnyń atysynan keshtiń batysyna deıin elordanyń basty sımvolyn qyzyqtaýǵa keletin adamdardyń qarasy kóp, uzyn sonar kezek baıqalýda.
Elena Mıhaılovanyń otbasymen birge Astanaǵa kelgenine nebári 3 kún bolǵan. Osy kúnderi olar elordanyń eń kórikti jerlerine baryp úlgergen, onyń ishinde EKSPO kórmesin de aralaǵan. Búgin olar «Báıterek» monýmentine barǵan, osylaısha kútpegen jerden elordanyń basty sımvolyna aınalǵan monýmenttiń 150 myńynshy bıletin satyp alǵan.
«Astanany qatty kórgimiz keldi. Astanalaryńyzdy qyzyqtaýǵa keldik. Jas bolsa da erekshe sáýletti shaharlaryńyz kózdiń jaýyn alady, kóshelerińiz keń ári taza, ǵımarattar bolsa qandaı ádemi, EKSPO kórmesinen alǵan áserimiz tipten keremet», - dedi Elena Mıhaılova.
Onyń sózine qaraǵanda, ol Astanaǵa alǵash ret kelip otyr.
«Biz qalanyń sáýletimen tanys bolǵymyz keldi, usynylǵan, shaharlaryńyzda bar qurylys qurylymdaryn jáne jasyl tehnologııalardy kórip, keremet áser aldyq», - dedi E.Mıhaılova.
«Biz sizderde úılerdiń kireberisterine deıin jap-jasyl kóshetterdiń otyrǵyzylǵanyn baıqadyq. Bul óńirdiń ekologııasy úshin jaqsy. Biz buny óńirlerińizde jeldiń ekpini qatty bolǵan soń jasalyp otyrǵan qadam dep túsindik. Qala jasyl kóshetter men aǵashtarǵa toly, bul óz aldyna aýa raıynyń jaqsarýyna alyp kelýine septigin tıgizedi dep oılaımyz. Jáne buǵan kóz jetkizip otyrmyz», - dedi týrıst.
«Astana Konvenshn Bıýro» JShS dırektory Sanııar Aıtekenov alystan kelgen qonaqty quttyqtap, eskertkish syılyqtardy tabystap, elordaǵa qaıta kelýin tiledi.
