«Báıterek» monýmentine kelýshiler úshin qolaıly jaǵdaılar jasaldy
NUR-SULTAN. QazAqparat - «Báıterek» monýmenti kelýshilerine qolaıly jaǵdaılar jasaldy, dep habarlaıdy QazAqparat Nur-Sultan qalasynyń Mádenıet jáne sport basqarmasyna silteme jasap.
«Báıterek» monýmentinde elorda turǵyndary men týrısterine qolaıly jaǵdaı jasaý úshin jaıly kútý aımaqtary ashyldy. Kezekte turǵan kezde jańbyrdan jáne kúnnen qorǵaný nemese mobıldik qurylǵylardy qýattaý nemese shaǵyn dámhanada tamaqtaný úshin kire beristerge shatyrlar ornatyldy. Sondaı-aq, bul jerden kirý bıletin satyp alyp, ekskýrsııa ýaqytyna balalardyń arbasyn qaldyrýǵa bolady», delingen habarlamada.
Sonymen qatar, bıyl jazda «Báıterek» monýmentiniń jumys kestesi de ózgerdi, endi ol tańǵy saǵat 09.00-den keshki 22.00-ge deıin ashyq bolady.
Bılettiń quny burynǵydaı: eresekter úshin - 700 teńge jáne balalar úshin - 300 teńge. 1-shi jáne 2-shi toptaǵy múgedekter, jetim balalar, múgedek balalar, 5 jasqa deıingi balalar monýmentke tegin kiredi. Al 3-shi toptaǵy múgedekter bıletti 50% jeńildikpen satyp alady. 
«Báıterek» monýmenti bir mezette 60 kelýshini qabyldaı alady, aǵylshyn, qazaq jáne orys tilderin erkin meńgergen 5 ekskýrsovod týrısterge qyzmet kórsetedi. Ekskýrsııalar adamdardyń qalaýy boıynsha uıymdastyrylady, ekskýrsııanyń quny bıletke engizilgen.
Aıta keterligi, «Báıterek» monýmenti - astananyń basty kórikti oryndarynyń biri. Nysan 2002 jyly boı kóterdi. Ony jylyna orta eseppen 580 myńǵa jýyq týrıst tamashalaıdy. Kelýshiler sany jazda kúrt artady.
