«Báıterek» monýmenti BUU-nyń 70 jyldyǵyna arnalǵan aktsııaǵa qatysty (FOTO/VIDEO)

ASTANA. QazAqparat - Birikken Ulttar Uıymynyń jetpis jyldyǵyna oraı ótkizilgen «Álemdi BUU-nyń kógildir túsine boıa» atty jahandyq aktsııa aıasynda Astanadaǵy «Báıterek» monýmenti osy naýqanǵa qosyldy. Bul turǵyda elordanyń sımvoly uıym merekesine oraı BUU-nyń týy tústes kógildir jaryqtarmen túrlendi.

Atap aıtqanda, bul aktsııaǵa 200-den astam álemdik tanymal ǵımarattar, murajaılar, kópirler jáne basqa da nysandar qatysýda. Uıymdastyrýshylardyń aıtýynsha, bul naýqanǵa qatysý - dúnıejúziniń azamattaryn biriktirýge, beıbitshilik pen damý jáne adam quqyqtary týraly úndeýdi taratýǵa járdemdesýge, sondaı-aq barlyǵyna ortaq laıyqty ómir súrý men gúldený ıdeıalaryn nasıhattaýǵa biregeı múmkindigin beredi.

Aıta keteıik, BUU 1945 jyly 24 qazanda quryldy. Qazirgi kezde uıymǵa qatysýshy 193 memleket bar. BUU óz qyzmetinde búkil álemde beıbitshilik pen qaýipsizdikti saqtaý, ulttar arasyndaǵy dostyq qatynastardy damytý, halyqaralyq máselelerdi sheshýde halyqaralyq yntymaqtastyqty júzege asyrý men adam quqyǵyn qurmetteýdi qoldaý, osyǵan qol jetkizýde ulttardyń birlesip áreket etetin ortalyǵy bolý maqsattaryn kózdeıdi.

Táýelsiz Qazaqstan tarıhynda 1992 jyldyń 2 naýryzy Qazaqstannyń Birikken Ulttar Uıymyna múshelikke qabyldanýymen erekshelenedi. Elimiz BUU Bas Assambleıasynyń 46-sessııasynda Uıymnyń jańa múshesi retinde ǵana emes, qazirgi zamannyń eń ózekti halyqaralyq problemalary boıynsha belsendi pozıtsııa ustanatyn memleket retinde múshe boldy.