Báıterek monýmenti alańynda halyqaralyq balalar kúnine arnalǵan merekelik is-sharalar ótýde
ASTANA. Maýsymnyń 1-i. QazAqparat - Búgin elordanyń sol jaǵalaýyndaǵy Báıterek monýmenti alańynda halyqaralyq balalar kúnine arnalǵan merekelik is-sharalar ótip jatyr.
Atalǵan merekeniń álemde toılana bastaǵanyna 60 jyl tolyp otyrǵandyǵyn atap ótken Bilim jáne ǵylym mınıstri Janseıit Túımebaev, «bizdiń memleketimiz balalardy qorǵaýǵa, olardy jetildirýge, qamqorlyq jasaýǵa úlken kóńil bólip otyr. Elbasymyz Nursultan Nazarbaev balalarǵa demalýyna, balalar baqshasyna barýyna, mektepte oqýyna úlken jaǵdaılar jasaýda. Onyń bir kórinisi qazirgi ýaqytta Memleket basshysynyń tikeleı bastamasymen júzege asyrylyp jatqan - «Balapan» baǵdarlamasy. «Balapan» baǵdarlamasynyń ereksheligi - mektepke deıingi balalardy túgeldeı balalar baqshasymen qamtamasyz etý. Osy jaqyn ýaqyttyń ishinde ǵana Astana qalasynda Prezıdenttiń qatysýymen 10 balabaqsha ashyldy», dedi.
Atalǵan is-shara barysynda elordalyq balabaqshalardyń shyǵarmashylyq ujymdary arasynda ótken «Astana shýaqtary» festıvaline qatysýshylardyń ishinen iriktep alynǵan kontserttik nómirleri, sahnalyq kıimderi, bıleri kelýshilerdiń nazaryna usynyldy. M.Ótemisuly atyndaǵy oqýshylar saraıynyń «Báıterek», «Gúldáýren», «ıÝnost Astany» syndy shyǵarmashylyq ujymdary da óz ónerlerin ortaǵa saldy. Sondaı-aq balalar asfaltte sýret salyp, ulttyq jáne sporttyq oıyndardyń kórigin qyzdyrdy. Búldirshilerdiń tilekteri jazylǵan sharlardy aspanǵa ushyrý rásimi de merekelik kóńil-kúıdi kótere tústi.
