Báıterek kúrdeli jóndeýden keıin qonaqtardy qabyldaýǵa daıyn
ASTANA. QazAqparat - Astanadaǵy Báıterek monýmentinde 2017 jyldyń qańtarynan beri kúrdeli jóndeý júrgizildi, dep habarlaıdy «QazAqparat» HAA tilshisi.
Monýmentte LED-ekrany bar zamanaýı óner galereıasy ashyldy, onda sýretshiler óz jumystaryn qoıa alady. Sondaı-aq, foıede gabarıtti maıysqaq dıspleı qoıylǵan.
Jańa dızaınnyń taǵy bir artyqshylyǵy - monýmenttiń kúmbeziniń astynda ornatylǵan hrýstal lıýstra. Lıýstranyń 90 protsenti taza hrýstaldan quralǵan jáne ushatyn mıftik qustar ispetti jasalǵan. Ol arnaıy Chehııadan ákelingen.
«Báıterekti kórýge 15 jyldyń ishinde bes-alty mıllıon adam keldi. Qazirgi tańda respýblıkanyń barlyq óńirlerinen Báıterekke kelý úshin kóptegen ótinishter tústi. Tek oqýshylardyń ózi 40 myńǵa jýyq bolady dep kútilýde. Balalar úıiniń tárbıelenýshileri, zeınetkerler, ardagerler burynǵysha tegin kiredi», - dep habarlady «Astana Báıterek» JShS dırektory Murat Saparǵalıev.
Bıletterdiń quny sál ǵana ózgerdi.
«Jóndeýden keıin eresekter úshin bılet quny 700 teńge, balalarǵa - 300 teńge bolady. Bılet 200 teńgege qymbattady», - dedi Saparǵalıev.
Báıterektiń jumys rejimi burynǵysha qaldy. 
