«Báıterek» Qorǵasta qoıma qurylysyn qarjylandyrdy
ASTANA. QazAqparat - «Báıterek» holdıngi «Qorǵas-Shyǵys qaqpasy» arnaıy ekonomıkalyq aımaǵyndaǵy qoıma orynjaılarynyń qurylysyn qarjylandyrdy, dep habarlaıdy QazAqparat.
«Báıterek» holdıngi «Qazaqstan temir joly» AQ-ymen jáne onyń enshiles uıymy «QTJ-Ekspress» AQ, «Verno Capital» ınvestıtsııalyq qory jáne «PNK Group» developerlik kompanııasymen birlese otyryp, zamanaýı qoıma orynjaılaryn salý jobasyn iske qosty», - delingen holdıng taratqan aqparatta.
Qoımalar «Qorǵas-Shyǵys qaqpasy» arnaıy ekonomıkalyq aımaǵy aýmaǵyna ornalastyrylady. Jobany «Báıterek» holdıngi óziniń enshiles uıymy «Qazyna Kapıtal Menedjment» AQ qurǵan Qazaqstannyń ınfraqurylymdyq qory arqyly qarjylandyrady.
«Qazaqstan damýynyń negizgi ınstıtýty bolyp tabylatyn «Báıterek» holdıngi eldiń ınfraqurylymdyq áleýetin «Nurly jol» jańa ekonomıkalyq saıasatymen túıisetin sheteldik balama jobalardy da qoldaýǵa daıyn», - dedi «Báıterek» UBH» AQ Basqarma tóraǵasynyń mindetin atqarýshy Aıdar Áriphanov.
Onyń aıtýynsha, «Báıterek» holdınginiń sheteldik ınvestorlarmen ózara is-qımylynyń ınvestıtsııalyq, saýda, ınnovatsııalyq jáne energetıka salalarynda bolashaǵy zor. Holdıng strategııalyq ınvestıtsııalyq áriptestikti ulǵaıtýǵa jáne ózara qyzyǵýshylyq tanytqan jobalardy qarjylandyrý baǵytyn jalǵastyra bermek.
