«Báıterek» kommýnaldyq sektordy jańǵyrtý jobalaryn 1 qyrkúıekke deıin qarjylandyrýy qajet – Úkimet
ASTANA. KAZINFORM – Premer-mınıstr Oljas Bektenov «Báıterek» holdıngine «Energetıkalyq jáne kommýnaldyq sektorlardy jańǵyrtý» boıynsha barlyq jobany qarjylandyrýdy jedeldetýdi tapsyrdy.
Úkimet otyrysynda Oljas Bektenov ınvestıtsııalyq jobalardyń júzege asýy qarjy ınstıtýttary tarapynan qarajattyń ýaqytyly bólinýine tikeleı baılanysty ekenin atap ótti.
– «Báıterek» holdıngi osy jyldyń sońyna deıin málimdelgen barlyq jobalardy bıylǵy 1 qyrkúıekke deıin dereý qarjylandyrýdy qamtamasyz etsin, – dedi Premer-mınıstr.
Sondaı-aq Úkimet basshysy 2027 jylǵa arnalǵan jobalarǵa daıyndyqty qazirden bastaý qajettigin aıtty.
– Barlyq óńir ákimdikteri bıylǵy 1 qyrkúıekke deıin 2027 jylǵa josparlanǵan jobalar boıynsha Ulttyq jobanyń elektrondyq platformasyna tıisti ótinim jiberip, olardy múddeli taraptarmen kelisýdi qamtamasyz etsin, – dedi O. Bektenov.
Al ulttyq joba aıasyndaǵy barlyq konkýrstyq rásimderdi bıylǵy 1 jeltoqsanǵa deıin aıaqtaý josparlanyp otyr.
Aıta keteıik, Memleket basshysynyń tapsyrmasymen Úkimet «Energetıkalyq jáne kommýnaldyq sektorlardy jańǵyrtý» ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
Qazaqstannyń kommýnaldyq sektoryn jańǵyrtýǵa 6 halyqaralyq qarjy ınstıtýty kómektesedi.
Bıyl elimizde 1,1 trln teńgeden astam qarjyǵa 12 myń shaqyrym ınjenerlik jeli jóndeledi.
