«Báıterek» qoldaý kórsetetin negizgi 4 sala naqtylanyp jatyr
ASTANA. KAZINFORM — Ulttyq ekonomıka mınıstriniń orynbasary Arman Qasenov ortalyq kommýnıkatsııalar qyzmetinde ótken baspasóz máslıhatynda damý ınstıtýttaryn transformatsııalaý úderisi «Báıterektiń» jumysyna da túzetý engizetinin aıtty.
— Damý ınstıtýttaryn transformatsııalaý júrgizilýde. «Báıterek» holdınginiń qurylymynda ınvestıtsııalyq qyzmet (Investment Board) quryldy. Osylaısha holdıng quramynda 4 ınvestıtsııalyq baǵytty qamtıtyn dırektsııa quryldy, — dedi ol.
Ol baǵyttar:
— Agro-ónerkásip kesheni;
— Turǵyn úı jáne qurylys,
— Taý-ken metallýrgııa kesheni, mashına jasaý, energetıka, munaı óńdeý;
— Kólik, týrızm, tsıfrlandyrý.
— Dırektsııanyń negizgi mindeti óńirlerdiń ekonomıkadaǵy basym qajettilikterin eskere otyryp, jobalardy sapaly daıyndaýǵa jáne olardy Kazakh Invest-ke berýge baǵyttalady, — dedi Arman Qasenov.
Buǵan deıin «Báıterek» eksportty qoldaý men ınvestıtsııa tartýdy kúsheıtetinin jazǵan edik.
