«Báıterek» kesheninen Soıýz-5-tiń alǵashqy ushyrylymy qashan júzege asady
ASTANA. KAZINFORM — Búgin Parlament Májilisiniń jalpy otyrysynda «2004 jylǵy 22 jeltoqsandaǵy Qazaqstan Úkimeti men Reseı Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» zańy qabyldandy.
QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevtiń aıtýynsha, atalǵan hattama aıasynda Kelisimge kelesi ózgeristerdi engizý qarastyrylǵan.
- Birinshi - ushý synaqtarynyń merzimin 2023 jyldan 2025 jylǵa aýystyrý;
- Ekinshi - 2028-2039 jyldar aralyǵynda «Báıterek» kesheninen reseılik taraptyń kepildendirilgen ushyrý sanyn jylyna 2 ushyrylymnan 3 ushyrylymǵa deıin arttyrý;
- Úshinshi - beırezıdent úshin qosylǵan qun salyǵynyń nóldik stavkasyn qoldaný.
- Qazirgi kezde «Báıterek» jobasy boıynsha taraptar arasynda buryn qol jetkizilgen kelisimderge sáıkes, Qazaqstan jaǵy ózine alǵan barlyq mindettemeni oryndap keledi. Qazaqstan qajet qarjyny bóldi, oryndaýshylarǵa avans tólendi. Jerústi ınfraqurylymyn jańǵyrtý boıynsha jumystar tıisti kestege sáıkes atqarylyp jatyr. Reseı jaǵy «Soıýz-5» zymyran-tasyǵyshyn, onyń baqylaý-tekserý apparatýrasyn daıyndaý jumystaryn iske asyryp otyr.
Sonymen qatar, reseılik óndirýshi kásiporyndarda tehnologııalyq jabdyqtardy daıyndaý boıynsha jumystar jalǵasyp jatyr, olardyń zaýyttyq synaqtary qazaqstandyq mamandardyń qatysýymen atqarylady. «Báıterek» kesheninen «Soıýz-5» zymyran-tasyǵyshynyń alǵashqy ushyrylýy 2025 jylǵy jeltoqsanǵa josparlanǵan, - dedi mınıstr.
Onyń sózine qaraǵanda, «Soıýz-5» zymyran-tasyǵyshy ekologııalyq taza sanalady, ıaǵnı kerosın jáne ottegimen jumys isteıdi. Baıqońyrdaǵy osy memleketaralyq jobany iske asyrý ǵarysh aılaǵynyń ınfraqurylymy men kadrlyq áleýetin saqtaý úshin mańyzdy.
- Qazir qazaqstandyq uıymdar 5 ǵarysh apparatyn paıdalanyp otyr. Otandyq óndirýshiler 5 ǵarysh apparatyn ázirlep jatyr, onyń ishinde 2 ǵarysh apparaty eksporttyq sharttar boıynsha shet elge arnalǵan. Ǵarysh apparattaryn ushyrý baǵytyndaǵy jumystar otandyq ǵarysh apparattary óndirisin nyǵaıtýǵa óziniń oń áserin tıgizedi. Óıtkeni tapsyrys berýshiler ǵarysh apparattaryn óndirip, ǵaryshqa ushyryp, sol ǵarysh keńistiginde osy apparattardyń jumys istep turǵan túrinde tapsyrýdy talap etedi. «Báıterek» keshenin ýaqytyly paıdalanýǵa berý Qazaqstanǵa tıimdi kommertsııalyq qurylymy bar, ıaǵnı ǵarysh apparattaryn ázirleý men qurýdan bastap olardy «Báıterek» kesheninen ushyrýǵa deıingi tolyqqandy ǵarysh salasyn qurýǵa múmkindik beredi, - dedi Jaslan Mádıev.
Buǵan deıin habarlanǵandaı, bıyl aqpan aıynda Parlament Májilisiniń qaraýyna «Báıterek» ǵarysh zymyran keshenin qurýǵa qatysty qujat kelip túskenin jazǵan edik.