«Báıterek» kesheninen birinshi zymyran jeltoqsanda ushyrylmaq

ASTANA. KAZINFORM — Reseı «Soıýz-5» zymyran tasymaldaǵyshy óndirisin «Baıqońyrǵa» kóshirýi múmkin. Bul jaıynda Senat depýtattarynyń saýalyna premer-mınıstr Oljas Bektenovtiń jaýabynda aıtylǵan.

— Úkimet «Baıqońyr» keshenin Reseı Federatsııasymen de, ózge memlekettermen de, jeke sheteldik seriktestermen de yntymaqtasa otyryp damytýǵa erekshe nazar aýdarady. Búginde reseılik tarap ǵarysh aılaǵyndaǵy 10 ushyrý kesheniniń úsheýin ǵana paıdalanady, — dedi Úkimet basshysy.

Onyń atap ótýinshe, ǵarysh aılaǵynyń ınfraqurylymy men kadrlyq áleýetin saqtap qalý úshin reseıliktermen birge «Báıterek» ǵarysh zymyran keshenin qurý jobasy júzege asyrylyp jatyr.

— «Báıterek» kesheniniń jerústi ǵarysh ınfraqurylymy nysandary men «Soıýz-5» zymyran tasymaldaǵyshyn jasaý boıynsha barlyq jumys josparly tártippen júrgizilip jatyr. «Báıterek» kesheninen «Soıýz-5» zymyran tasymaldaǵyshyn birinshi ret ushyrý 2025 jyldyń jeltoqsanyna josparlanǵan. Sonymen qatar reseılik tarap Reseı aýmaǵynan «Baıqońyr» ǵarysh aılaǵyna «Soıýz-5» zymyran tasymaldaǵyshy óndirisin kóshirý máselesin pysyqtap jatyr, — dedi Oljas Bektenov.

Buǵan deıin «Baıqońyrdyń» birqatar týrıstik nysany Qazaqstanǵa qaıtarylatyndyǵyn jazǵan edik.