«Báıterek» kesheni qosylǵannan keıin geptılde jumys isteıtin «Proton» zymyranyn ushyrýdy satylap qysqartý nemese múldem doǵarý týraly másele qoıýǵa bolady - T. Musabaev
ASTANA. Naýryzdyń 3-i. QazAqparat /Qanat Mámetqazyuly/ - «Báıterek» kesheni iske qosylǵannan keıin ǵana «Baıqońyr» ǵarysh aılaǵynan geptılde jumys isteıtin «Proton» zymyran tasyǵyshyn ushyrýdy satylap qysqartý nemese ondaı zııandy zymyrandardy ushyrýdy múldem doǵarý týraly másele qoıýǵa bolady.
Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasy men Reseı Federatsııasy arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda QR Ulttyq ǵarysh agenttiginiń tóraǵasy Talǵat Musabaev osylaı málim etti, dep habarlaıdy QazAqparat.
«Baıqońyr ǵarysh aılaǵyndaǵy «Báıterek» zymyran-ǵarysh kesheni qoldanysqa berilgennen keıin Qazaqstan ǵaryshtyq-kommertsııalyq negizde ǵarysh apparattarynyń ushyrylymdaryna qatysa alady ári budan sáıkesinshe dıvıdentterge ıe bolady. Erekshe toqtalatyn másele, «Báıterek» kesheni iske qosylǵannan keıin «Baıqońyr» ǵarysh aılaǵynan geptılde jumys isteıtin «Proton» zymyran tasyǵyshyn satylap qysqartý nemese ondaı zııandy zymyrandardy ushyrýdy múldem doǵarý týraly másele qoıýǵa bolady», dedi zań jobasy boıynsha baıandaǵan QR Ulttyq ǵarysh agenttiginiń tóraǵasy Talǵat Musabaev.
Onyń aıtýynsha, «Baıqońyr» kesheninde Qazaqstan atsalysýǵa nıet etip otyrǵan taǵy bir nysan orta synypty zymyran tasyǵysh bazasyndaǵy «Zenıt» jobasy bolyp tabylady.
«Zenıt» zymyran tasyǵyshy ekologııalyq qaýipsiz komponenttermen jumys isteıdi. Búgingi kúni Qazaqstan tarapynyń reseılik-ýkraınalyq kompanııanyń qyzmeti arqyly halyqaralyq ǵaryshtyq qyzmetine qatysý sharalary qarastyrylýda. Bundaı jobalarǵa qatysý Qazaqstanǵa kommertsııalyq ushyrýlardan qarajat tabýǵa ǵana emes, otandyq sala mamandarynyń biliktiligin arttyrýǵa da septigin tıgizetini anyq», dedi T. Musabaev.
