«Báıterek» holdınginiń róli kúsheıtiledi
ASTANA. KAZINFORM – Ekonomıkalyq ósýdiń proaktıvti saıasatyn iske asyrý úshin «Báıterek» holdınginiń róli kúsheıtiledi. Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Investıtsııalardy ulǵaıtý qajettiligin eskere otyryp jáne joǵary paıyzdyq mólsherlemeler jaǵdaıynda ekinshi deńgeıdegi bankter men «Báıterek» holdıngi naqty sektordy kredıtteýdiń negizgi kózderine, sondaı-aq ekonomıkanyń ósý núkteleri men sala kóshbasshylaryn qarjylandyrýdyń negizgi arnalaryna aınalady. Ekonomıkalyq ósýdiń proaktıvti saıasatyn iske asyrý úshin «Báıterek» holdınginiń róli kúsheıtiletin bolady. Holdıngtiń bólý qyzmetinen strategııalyq ınvestıtsııalyq qyzmetine kóshý josparlanyp otyr. Búginde ol elimizdiń Investıtsııalyq holdıngine aınaldy, - dedi Serik Jumanǵarın.
Onyń aıtýynsha, holdıng ulttyq ekonomıka úshin barynsha mýltıplıkatıvti áserdi qamtamasyz etetin 15-20 júıe quraýshy jobany iske asyrýǵa shoǵyrlanady. Qarjylandyrý úshin basymdyq taý-metallýrgııalyq keshenine, mashına jasaýǵa, energetıkaǵa, ınfraqurylymǵa, týrızmge, agroónerkásiptik keshenge, tamaq ónerkásibine, hımııa, munaı-gaz hımııasyna, agrohımııaǵa, qurylys materıaldaryn óndirýge beriledi.
- Holdıngtiń 2026 jylǵa arnalǵan jobalar portfeliniń 42 paıyzy hımııa jáne munaı-gaz hımııa ónerkásibin, 19,6 paıyzy kólik jáne logıstıkany, 12,1 paıyzy energetıkany, 7,1 paıyzy taý-metallýrgııalyq keshendi, 6,4 paıyzy agroónerkásiptik keshendi jáne tamaq ónerkásibin qarjylandyrýǵa tıesili. Ol úshin Úkimet respýblıkalyq bıýdjet parametrlerine sáıkes 2026 jyly «Báıterek» aktsıonerlik qoǵamynyń 1 trln teńgege deıingi bıýdjet qarajatyn bólýdi jalǵastyrady. Odan ári qarjylandyrýda ekinshi deńgeıdegi bankterdiń qarajatyn tartý basymdyqqa ıe bolady, - dedi vıtse-premer.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.