«Báıterek» holdınginiń dırektorlar keńesi 2033 jylǵa deıingi jańartylǵan damý josparyn maquldady
ASTANA. KAZINFORM – Premer-mınıstr Oljas Bektenov «Báıterek» ulttyq ınvestıtsııalyq holdıngi» AQ dırektorlar keńesiniń otyrysyn ótkizdi. Otyrys barysynda holdıngtiń qyzmeti men ony odan ári damytýǵa qatysty birqatar mańyzdy másele qaraldy. Bul týraly Úkimettiń baspasóz qyzmeti habarlady.
Memleket basshysynyń tapsyrmalaryn oryndaý aıasynda Dırektorlar keńesi Holdıngtiń 2024-2033 jyldarǵa arnalǵan damý josparyn jańartýdy maquldady. Engizilgen ózgerister «Báıterektiń» memlekettik ınvestıtsııalyq saıasatty júzege asyrýdaǵy rólin kúsheıtýdi, jeke kapıtaldy tartý tetikterin keńeıtýdi jáne ınvestıtsııalyq bastamalardy qoldaýdyń jańa tásilderin qalyptastyrýdy kózdeıdi.
Holdıng qyzmetiniń jańa modeli úsh strategııalyq baǵytty qamtıdy, olar – aktıvterdi tıimdi basqarý, qýatty bıznesti damytý úshin jaǵdaı jasaý jáne halyqtyń ómir súrý sapasyn arttyrý.
Negizgi basymdyqtardyń biri – ekonomıkanyń naqty sektoryn aýqymdy kólemde qarjylandyrý. Holdıng respýblıkalyq bıýdjetten jyl saıyn 1 trln teńge kóleminde kapıtal alý arqyly kásipkerlik blogyn qarjylandyrýdyń jyldyq kólemin 8 trln teńge deńgeıinde saqtaýdy josparlap otyr. 2026 jyldyń basynan beri Holdıngtiń barlyq qoldaý quraldary boıynsha, onyń ishinde turǵyn úı baǵyty boıynsha ıgerý kórsetkishterin eskere otyryp, jalpy qarjylandyrý kólemi 6,9 trln teńgeni qurady. Onyń 5,1 trln teńgesi kásipkerlikti qoldaýǵa baǵyttaldy.
Sonymen qatar qarjylyq model bıýdjet qarajatyna táýeldilikti kezeń-kezeńimen tómendetýdi kózdeıdi. 2029 jyldan bastap naryqtyq qarjy kózderin keńeıtý esebinen bıýdjettik qarjylandyrýdy birtindep almastyrý josparlanǵan.
Jańartylǵan Damý jospary Holdıngtiń strategııalyq ınvestor jáne elde qalyptastyrylyp jatqan ınvestıtsııalyq ekojúıeniń negizgi qatysýshylarynyń biri retindegi rólin bekite túsedi. Negizgi basymdyq jobalardy sapaly daıyndaýǵa, jeke ınvestıtsııalardy tartýǵa jáne bıznesti qarjylandyrý kezinde ekinshi deńgeıdegi banktermen ózara is-qımyldy keńeıtýge berilgen.
Holdıngtiń jumysy salalyq basymdyqtar men ekonomıkanyń qajettilikterin eskere otyryp, jobalardy qalyptastyrýdy jáne súıemeldeýdi kózdeıtin «ınvestıtsııalarǵa tapsyrys» qaǵıdaty boıynsha jańa ınvestıtsııalyq tsıkl aıasynda uıymdastyrylady. Qabyldanyp jatqan sharalar ekonomıkany ártaraptandyrýǵa jáne shıkizattyq emes sektordy qoldaýdy keńeıtýge baǵyttalǵan.
Dırektorlar keńesi sondaı-aq Holdıngtiń 2025 jylǵy jyldyq esebin bekitti. ESG-kórsetkishter alǵash ret Holdıngtiń búkil kompanııalar toby boıynsha shoǵyrlandyrylǵan negizde usynyldy.
Budan bólek, Korporatıvtik basqarý kodeksiniń jáne Holdıngtiń ornyqty damý salasyndaǵy saıasatynyń talaptaryna sáıkes ázirlengen Holdıngtiń 2025 jylǵy ornyqty damý týraly esebi bekitildi.
Qabyldanǵan sheshimder Holdıngtiń ınvestıtsııalyq rólin kúsheıtýge, qyzmetiniń ashyqtyǵyn arttyrýǵa jáne korporatıvtik basqarýdy jetildirýge baǵyttalǵan.
«Báıterek» kommýnaldyq sektordy jańǵyrtý jobalaryn 1 qyrkúıekke deıin qarjylandyrýy qajet ekenin jazǵan edik.
