«Báıterek» holdınginiń 2033 jylǵa deıingi damý josparyna ózgerister engizildi

ASTANA. KAZINFORM — Joǵary aýdıtorlyq palatanyń usynymy boıynsha «Báıterek» holdınginiń 2024-2033 jylǵa deıingi damý josparyna ózgerister engizilgeni belgili boldy.

QR Joǵary aýdıtorlyq palatasy atap ótkendeı, ózgerister holdıngtiń boryshyn basqarý tıimdiligin jáne onyń qarjylyq ornyqtylyǵyn arttyrýǵa baǵyttalǵan.

— Bıyl Joǵary aýdıtorlyq palata «Báıterek» holdınginde jáne onyń enshiles kompanııalarynda memlekettik aýdıt júrgizdi. Tekserý qorytyndysy boıynsha QR Úkimetine Holdıngtiń 2024-2033 jyldarǵa arnalǵan damý josparyn qaıta qaraý jáne túzetý usynyldy. Máselen, oǵan: borysh saıasatynyń negizgi erejelerin; boryshtyq júktemeni «eskertetin» kórsetkishterdi belgileı otyryp boryshtyq ornyqtylyq stsenarıılerin; «Báıterektiń» memlekettik qarajatqa táýeldiligin azaıtý úshin jınaqtalǵan mindettemelerdi eskere otyryp «Memlekettik emes qaryz alý kózderiniń úlesi» kórsetkishin qosý usynyldy. Nátıjesinde bul ózgerister Damý josparyna engizildi. Ol úshin QR Úkimeti 2023 jylǵy 25 jeltoqsandaǵy qaýlyny túzetip, jańa qaýly qabyldady. Bul túzetýler holdıngke boryshty tıimdirek basqarýǵa, shamadan tys boryshtyq júkteme táýekelderin aldyn ala qadaǵalap otyrýǵa jáne problemalar týyndaǵanǵa deıin sharalar qabyldaýǵa múmkindik beredi. Memlekettik emes kózderden qaryz alý úlesin bekitý memlekettik qarjylandyrýǵa táýeldilikti azaıtyp, uzaq merzimdi perspektıvada kompanııanyń ornyqtylyǵyn arttyratyn bolady. Nátıjesinde munyń bári borysh saıasatyn anaǵurlym ashyq jáne teńgerimdi etedi., — delingen palata taratqan aqparatta.

Vedomstvonyń málimetinshe, bul holdıngtiń ózine de, tutastaı alǵanda respýblıkanyń qarjy júıesine de oń áserin tıgizedi.

Osyǵan deıin Prezıdent Jarlyǵymen Joǵary aýdıtorlyq palatanyń quzyreti keńeıtildi. Atap aıtqanda, palataǵa Qazaqstan Respýblıkasynyń zańnamasyna sáıkes sotqa talap qoıý quqyǵy berildi.