«Báıterek» holdıngin qaıta qurý: Dırektorlar keńesi ınvestıtsııa tartý boıynsha mindettemeni bekitti
ASTANA. KAZINFORM - Premer-mınıstr Oljas Bektenov Memleket basshysynyń ekonomıkanyń naqty sektoryn qoldaýdy kúsheıtý jáne ınvestıtsııalar tartý jónindegi tapsyrmalary sheńberinde holdıngti odan ári transformatsııalaý máseleleri boıynsha «Báıterek» ulttyq basqarýshy holdıngi» AQ dırektorlar keńesiniń otyrysyn ótkizdi. Bul týraly Úkimettiń baspasóz qyzmeti habarlady.
Holdıngtiń qyzmetin keńeıtýdi jáne onyń ınvestıtsııalyq saıasatyn jańartýdy eskere otyryp, Dırektorlar keńesiniń 2026 jylǵa arnalǵan jumys jospary qaralyp, bekitildi. Qujat transformatsııalyq kún tártibin júzege asyrý, korporatıvtik basqarýdy jetildirý, bıznesti qoldaý quraldarynyń tıimdiligin arttyrý jáne enshiles qurylymdardyń ınvestıtsııalyq qyzmetin keńeıtý máselelerin qamtıdy.
Dırektorlar keńesi «Báıterek» ulttyq ınvestıtsııalyq holdıngi» AQ-nyń transformatsııasyn maquldady. Investholdıngke ınfraqurylymdyq, eksporttyq jáne ındýstrııalyq jobalardy qoldaý boıynsha qosymsha fýnktsııalar beriledi. Negizgi maqsat – kapıtaldy belsendi tartý, ishki óndiristi jáne ımportalmastyrýdy damytý. Sondaı-aq shıkizattyq emes eksporttyń úlesin ulǵaıtýǵa jáne básekege qabiletti bıznesti qalyptastyrýǵa basa nazar aýdarylyp otyr. Nátıjesinde joǵary ónimdi kásiporyndar ashylyp, jańa jumys oryndary qurylmaq. Bul ekonomıkanyń sapaly damýyn jáne halyq tabysynyń ulǵaıýyn qamtamasyz etedi.
- Qurylymy jáne mazmuny jaǵynan qaıta qurý nátıjesinde Holdıng biz basym dep aıqyndaıtyn sektorlarǵa qarjy, quzyretter jáne jańa tehnologııalar alyp keletin iri ınvestorlardy tartý jónindegi tıimdi tetikke aınalýǵa tıis. Alda aýqymdy jumys kútip tur, - dedi Oljas Bektenov.
Prezıdenttiń jalpyǵa birdeı tsıfrlandyrý jónindegi tapsyrmalaryn júzege asyrý sheńberinde Holdıng basshylyǵynyń kásipkerlikti qoldaý salasyna JI quraldaryn engizý boıynsha jańa paıdaly áser koeffıtsıenti belgilendi. Sondaı-aq tartylatyn sheteldik ınvestıtsııalardyń kólemine basa nazar aýdara otyryp, tóraǵa orynbasarlarynyń jetekshilik etetin baǵyttary boıynsha paıdaly áser koeffıtsıentin túzetý, oń dınamıkany qamtamasyz etý úshin qajetti josparly mánder men maqsattardy tutastaı qaıta qaraý tapsyryldy.
Otyrys barysynda Táýekelder boıynsha jıyntyq esep pen Sybaılas jemqorlyqqa qarsy komplaens-qyzmettiń 2025 jylǵy III toqsandaǵy esebi bekitildi. «Báıterek» basshylyǵy ınvestıtsııalyq qyzmetti keńeıtý jaǵdaıynda qarjy modeliniń turaqtylyǵy jáne korporatıvtik táýekel-menedjment júıesiniń tıimdiligi týraly baıandady.
Úkimettiń, Ulttyq bank pen Qarjy naryǵyn retteý jáne damytý agenttiginiń 2026-2028 jyldarǵa arnalǵan birlesken is-qımyl baǵdarlamasy sheńberinde «Báıterek» holdıngi ekonomıkanyń naqty sektoryna kredıt berý kólemin ulǵaıtady. Búgingi tańda bızneske jalpy somasy 5,7 trln teńgege qoldaý kórsetildi. Nátıjesinde jańa 29 myń jumys orny ashyldy. Bıyl bıznesti memlekettik qoldaýdyń jalpy mólsheri 8 trln teńgege deıin jetkiziletin bolady.
«Báıterek» Holdıngi jańa makroekonomıkalyq turaqtandyrý baǵdarlamasyn iske asyrýda negizgi rólge ıe bolmaq.
«Báıterek» holdınginiń róli kúsheıtiledi.