«Báıterek» holdınginiń jarǵylyq kapıtaly 14 mlrd. teńgege ulǵaıdy
ASTANA. QazAqparat - «Báıterek» Ulttyq basqarýshy holdıngi» AQ Dırektorlar keńesiniń kezekti otyrysy ótti. Bul týraly holdıngtiń baspasóz qyzmetinen habarlandy.
Taratylǵan aqparatqa qaraǵanda, Dırektorlar keńesiniń músheleri QR Úkimetiniń keńeıtilgen otyrysynda Memleket basshysy N.Nazarbaevtyń ekonomıkalyq ósimdi qoldaý, ekonomıkany ártaraptandyrý jáne kásipkerlikti yntalandyrý jónindegi tapsyrmalary turǵysynan «Báıterek» holdınginiń aǵymdaǵy jumysyna qatysty birqatar máselelerdi qarady.
«Dırektorlar keńesi «Damý» kásipkerlikti damytý qory» AQ úshin «Báıterek» holdınginiń kepildigimen 200 mıllıon eýro somasyna Eýropalyq ınvestıtsııalyq bankiniń qaryzyn tartýdy maquldady. Munan bólek, «QazEksportGarant» eksporttyq-kredıttik saqtandyrý korporatsııasy» AQ-ny kapıtaldandyrý úshin holdıngtiń jarǵylyq kapıtalyn 14 mlrd. teńgege ulǵaıtý týraly sheshim qabyldandy»,- delingen habarlamada.
Sonymen qatar holdıngtiń jalpy somasy 97,9 mlrd. teńgeni quraıtyn úsh bıýdjettik nesıeni tartý máselesi de maquldandy. Qarajat Indýstrııalyq-ınnovatsııalyq damytýdyń 2015-2019 jyldarǵa arnalǵan memlekettik baǵdarlamasy men «Bıznestiń jol kartasy - 2020» bıznesti qoldaý men damytýdyń biryńǵaı baǵdarlamasy aıasynda ınvestıtsııalyq jobalardy qarjylandyrý úshin «Qazaqstannyń damý banki» AQ-y men «QDB-Lızıng» AQ-qa arnalady.
