«Báıterek» holdınginiń tóraǵasy Qytaıdyń Baodın qalasyndaǵy avtomobıl zaýytyn aralady
«Báıterek» ókilderi eń áýeli Sıýshýı zaýytyna bas suqty. Munda holdıngtiń basqarma tóraǵasy Qanat Sharlapaev CKD tásilimen qurastyrylatyn HAVAL avtomobıliniń óndirisimen tanysty.
Atalǵan tehnologııany Astana Motors-tyń jańa jobasyna engizý josparlanyp otyrǵanyn aıta ketý kerek.
«Áýeli sizderge «Báıterek» holdıngimen áriptestikke qyzyǵýshylyq tanytqandaryńyz úshin alǵys aıtamyn», - dedi Qanat Sharlapaev zaýyt ókilderimen kezdesýinde.
Zaýyttyń ónimdilik deńgeıi kóńil kónshitedi: bir jumys kezeginde 600 kólik qurastyrylady.
Al onyń shekti múmkindigi úsh jumys kezeginde 250 myń kólik shyǵarýǵa jetedi.
Odan bólek dánekerleý tsehynda 500-den astam shvetsııalyq robot jumys isteıdi. Osy robottardyń arqasynda bir mezette 5 túrli modeldi dánekerleýge múmkindik bar.
«Báıterek» UBH enshiles uıymdarynyń biri Ónerkásipti qoldaý qory Qazaqstandaǵy mýltıbrendti avtomobıl zaýytynyń qurylysyn qarjylandyrýǵa qatysyp otyr.
Bul qurylysqa Great Wall Motor Company Limited te atsalysady.
Budan keıin «Báıterek» holdınginiń tóraǵasy Qytaıdaǵy eń uzyn test-draıv alańǵa bardy. 2400 metrlik trekke jol jabynynyń 10 tıpi tóselgen.
Aýdany 250 myń sharshy metr bolatyn aýmaqta zertteý ortalyǵy, synamalyq óndiris ortalyǵy, synaq ortalyǵy, dızaın ázirleý ortalyǵy jáne derekterdi óńdeý ortalyǵy ornalasqan.
Búginde Haval tehnıkalyq ortalyǵynda 10 myńnan astam qyzmetker jumys isteıdi. Onyń ishinde 1000-nan astamy - jetekshi jergilikti jáne sheteldik sarapshylar.
Sondaı-aq, «Báıterek» ókilderi lıtıı batareıalaryn shyǵaratyn Feng Chao zaýytynda boldy.
Bul zaýyt kobalt qospasy joq lıtıı batareıalarynyń alǵashqy toptamasyn óndirip otyr.
Bul jerde Qanat Sharlapaev kásiporynnyń zerthanasyn aralap, sýtegi energııasy R&D ortalyǵynyń jumysymen tanysty.
Sondaı-aq, ol ózge de jobalarmen tanysyp, avtokólikter tanystyrylymyna qatysty.
Jospardaǵy nysandardyń bárin aralaǵannan keıin Qazaqstannan barǵan delegatsııa men kásiporyn basshylyǵy konstrýktıvti kelissóz júrgizdi.
