«Báıterek» holdınginiń basshysy BAÁ Ortalyq bankiniń tóraǵasymen kezdesti

«Báıterek» UBH» AQ Basqarma tóraǵasy Qanat Sharlapaev Birikken Arab Ámirlikteri Ortalyq bankiniń tóraǵasy Uly Mártebeli Haled Mohamed Balamanyń basshylyǵymen Qazaqstanǵa kelgen BAÁ delegatsııasymen kezdesý ótkizdi. Eki eldiń qarjy salasyndaǵy, onyń ishinde birlesken ınvestıtsııalyq jobalardy iske asyrýdaǵy yntymaqtastyǵynyń keleshegi kezdesýdiń basty taqyryby boldy.

BAÁ delegatsııasynyń quramynda Ámirlikterdiń Ortalyq bankiniń ókilderimen qosa, memlekettik holdıngtik kompanııa Mubadala Investment Company jáne egemendi qor Abu Dhabi Developmental Company ókilderi boldy.

Aıta keteıik, «Báıterek» holdıngi men onyń enshiles kompanııalarynyń Ámirlikterdiń memlekettik jáne jeke kompanııalarymen birlesip jumys isteýde tájirıbesi mol. Mysaly, «Qazyna Kapıtal Menedjment» AQ Falah Growth Fund, Kazakhstan Infrastructure Fund C.V. jáne Abu Dhabi Development Holding Company birlesken qorlary arqyly Mubadala Investment Company-men qarym-qatynas ornatqan. Sondaı-aq «Qazaqstannyń Damý Banki» AQ men «KazakhExport» ESK» AQ-da BAÁ kapıtaly qatysatyn birneshe jobalar qaralýda.

Kezdesý qorytyndysy boıynsha taraptar Qazaqstan men Birikken Arab Ámirlikteriniń qarjy ınstıtýttary arasyndaǵy yntymaqtastyq eki eldiń ekonomıkasy úshin asa mańyzdy ekendigin atap ótti.