«Báıterek» holdınginiń basqarma músheleri saılandy
ASTANA. 23 shilde. QazAqparat - Búgin Úkimet úıinde QR Premer-Mınıstri Serik Ahmetovtiń tóraǵalyǵymen «Báıterek» Ulttyq basqarý holdıngi» AQ Dırektorlar keńesiniń birinshi otyrysy ótti.
Bul týraly primeminister.kz saıtynan habarlandy.
Kún táribinde birqatar máseleler qaraldy, atap aıtqanda, holdıngtiń basqarma múshelerin saılaý, korporatıvtik hatshyny taǵaıyndaý, shtattyq quramdy jáne holdıngtiń 2013 jylǵa bıýdjetin bekitý. Sondaı-aq, otyrysta holdıngtiń ishki qyzmetin retteıtin qujattar tizbesi bekitildi.
QR Premer-Mınıstriniń birinshi orynbasary - Óńirlik damý mınıstri Baqytjan Saǵyntaev, Premer-Mınıstrdiń orynbasary Qaırat Kelimbetov jáne Premer-Mınıstrdiń orynbasary - Indýstrııa jáne jańa tehnologııalar mınıstri Áset Isekeshev holdıngtiń dırektorlar quramyna endi.
Sondaı-aq, holdıngtiń dırektorlar quramyna QR Prezıdenti Ákimshiligi basshysynyń orynbasary Baqyt Sultanov, QR Ekonomıka jáne bıýdjettik josparlaý mınıstri Erbolat Dosaev, QR Qarjy mınıstri Bolat Jámishev jáne «Báıterek UBH» AQ basqarmasynyń tóraǵasy Qýandyq Bishimbaev kirdi.
«Báıterek» UBH» AQ QR Prezıdentiniń 2013 jylǵy 22 mamyrdaǵy jarlyǵyna sáıkes quryldy. Holdıngti qurýdaǵy maqsat- ekonomıkany damytý men ártaraptandyrýǵa yqpaldasý, ınvestıtsııa tartý, klasterlerdi damytý men korporatıvtik basqarý júıelerin onyń enshiles uıymdarynda jetildirý bolyp tabylady.
Holdıngti senimdi basqarý júıesinde «Qazaqstannyń damý banki» AQ, «Damý» KDQ» AQ, «Qazaqstannyń ınvestıtsııalyq qory» AQ, «Qazyna kapıtal menedjment» AQ, «Qazaqstannyń ıppotekalyq kompanııasy» AQ jáne basqalar sııaqty memlekettik qarjylyq ınstıtýttar bar.
