«Báıterek» holdınginiń 2023 jylǵa deıingi damý strategııasy bekitildi
ASTANA. KAZINFORM - Búgin Úkimette QR Premer-Mınıstri Serik Ahmetovtiń tóraǵalyǵymen «Báıterek» Ulttyq basqarýshy holdıngi» AQ Dırektorlar keńesiniń 2014 jylǵy alǵashqy ishteı otyrysy ótti. Bul týraly «Báıterek» UBH» AQ baspasóz qyzmeti habarlady.
«Dırektorlar keńesi Holdıngtiń 2014-2023 jyldarǵa arnalǵan damý strategııasyn bekitti. Qujatta Holdıngti ıntegratsııalanǵan damý ınstıtýty retinde qalyptastyrýǵa baılanysty mindetter men taıaý onjyldyqtaǵy strategııalyq baǵyttar aıqyndalǵan», - delingen ulttyq holdıngtiń habarlamasynda.
Sondaı-aq, dırektorlar keńesi otyrysta «Báıterek» holdınginiń jarǵylyq kapıtalyn bıýdjettik qarjy esebinen 20 mlrd 330 mln 779 teńgege kapıtalızatsııalaý týraly sheshim qabyldady. Bul qarjynyń negizgi bóligi «Qazyna kapıtal menedjment» AQ-nyń qarjylyq kapıtalyn ulǵaıtyp, Infraqurylymdyq jobalar qoryn qurýǵa jumsalady. Qalǵan 330 mln 779 myń teńge «Tehnologııalyq damý jónindegi ulttyq agenttik» AQ-yna aspap jasaý jónindegi konstrýktorlyq bıýro qurýǵa bólinedi.
Budan bólek, dırektorlar keńesi «Báıterek» holdıngi jáne «Qazaqstandyq memlekettik-jeke áriptestik ortalyǵy» AQ tarapynan «Memlekettik-jeke áriptestik jobalaryn súıemeldeý» JShS-niń jarǵylyq kapıtalyna úleske kirý máselesin talqylady. Memlekettik-jeke áriptestik jobalardy súıemeldeý ortalyǵynyń jarǵylyq kapıtaly 200 mln teńge kóleminde belgilengen. Onyń 150 mln teńgesi nemese 75 paıyzy «Báıterek» holdınginiń úlesine beriledi.
«Qazaqstandyq memlekettik-jeke áriptestik ortalyǵy» AQ-nyń úlesi 50 mln teńge nemese 25 paıyzdy quraıdy. Memlekettik-jeke áriptestik jobalaryn súıemeldeý ortalyǵynyń negizgi jumysy ınfraqurylymdyq, sonyń ishinde memlekettik-jeke áriptestik negizinde júzege asyrylatyn jobalardy qurylymdaý jáne súıemeldeýge baǵyttalady. Ortalyqtyń aldyn-ala kelisimnen ótken jobalarynyń ishinde Almaty stansasyn aınalyp ótetin temirjol men Almaty jáne Qaraǵandy qalalarynda 300 tósek oryndyq kópsalaly aýrýhanalar qurylysy bar.
Otyrysta holdıng quramyndaǵy enshiles mekemeler aktıvteriniń qurylymyn ońtaılandyrý máselesi de talqylandy. Saraptama boıynsha, holdıng qurylymynda profıldi emes aktıvter joq. Degenmen, birqatar enshiles kompanııalar ınvestıtsııalyq qorlarǵa nemese ınvestıtsııalyq jobalardy júzege asyrýǵa qatysyp kelgen. Osyǵan oraı, jyl sońyna deıin «Damý» kásipkerlikti qoldaý qory 5 mıkrokredıttik uıymnan shyǵady. «Tehnologııalyq damý jónindegi ulttyq agenttik» AQ tehnoparkter jumysyn ońtaılandyrý maqsatynda Almaty aımaqtyq tehnoparki men Sátbaev atyndaǵy Qazaq Ulttyq tehnıkalyq ýnıversıtetiniń tehnoparkin biriktirý baǵytynda jumys jasap jatyr.
