«Báıterek» holdıngi jastarǵa jan-jaqty qoldaý kórsetip otyr

ASTANA. QazAqparat - Áleýmettik baǵdarlanǵan memlekettik baǵdarlamalardyń operatory bola otyryp, «Báıterek» holdıngi men onyń enshiles uıymdary qazaqstandyqtardy qoljetimdi baspanamen, jumyspen jáne bıznes-jobalardy damytýǵa arnalǵan quraldarmen qamtamasyz etýde mańyzdy ról atqarady. Osy mindetterdi sheshý sheńberinde Holdıng jastar bastamalaryn iske asyrýǵa baǵyttalǵan birqatar jobalardy júzege asyrady. Bul Memleket basshysy Nursultan Ábishuly Nazarbaevtyń Jastar jylynyń saltanatty ashylýynda qoıǵan mindetterine sáıkes keledi.

Bul baǵytta birinshi blok - «Damý» qory arqyly jastar kásipkerligin qoldaý.

«Eńbek» nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasynyń sheńberinde mıkro jáne shaǵyn bıznes sektoryndaǵy bastaýshy kásipkerler ınvestıtsııalaýǵa bes jylǵa deıingi merzimmen 6 paıyzdan aspaıtyn mólsherlememen jeńildikti sharttarda 8 myń AEK-ke deıin kredıt alady. Sonymen qatar, baǵdarlama qatysýshylary qaryz somasynyń 85% deıin kepildik alý múmkindigine ıe.

Kraýdfandıng qyzmetin iske qosý 2018 jyly júzege asyryldy - bul jobany ujymdyq qarjylandyrý tásili, onda ónim nemese qyzmet jasaý úshin aqsha tutynýshylardan túsedi. Qor bastamashy kásipkerlerge qujattardy tapsyrý, Starttime.kz kraýdfandıngilik platformasynda jáne buqaralyq aqparat quraldarynda ilgeriletý, túrli memlekettik granttar alýǵa ótinimder berý jáne t.b. boıynsha konsýltatsııalyq-praktıkalyq qoldaý kórsetedi.

Sonymen qatar, «Damý» qory jergilikti atqarýshy organdarmen birigip, bastaýshy kásipkerlerge arnalǵan aımaqtyq baǵdarlamalardy júzege asyrady. Mysaly, «Astana ZhastStart» jáne «Aqtóbe ZhasStart» baǵdarlamalary 29 jasqa deıingi jastarǵa arnalǵan, kredıt somasy 8,5% aspaıtyn mólsherleme boıynsha 20 mln. teńgeden aspaıdy. «Astana Start Up» bastaýshy kásipkerlerge 7,9% mólsherlemesi boıynsha 50 mln. teńgeden aspaıtyn qaryz somasyna qoldaýdy kózdeıdi. Basqa bastamalar qatarynda «Nur Kapıtal» (Mańǵystaý oblysy), «Qos qoldaý» (Qostanaı oblysy), «Damý Aqjaıyq» (Batys Qazaqstan oblysy), «Altyn Keme» (Atyraý oblysy), «Jibek Joly» (Almaty) jáne basqa baǵdarlamalar bar.

Qoldaýdyń ekinshi blogy - «Qazaqstannyń turǵyn úı qurylys jınaq banki» AQ arqyly jas azamattardy turǵyn úımen qamtamasyz etý. Qazirgi ýaqytta bul joba «Almaty jastaryn 2017-2020 jj. qoldaý jol kartasyna» sáıkes ázirlengen «Almaty jastary» baǵdarlamasy sheńberinde júzege asyrylýda.

Osy baǵdarlamany iske asyrý úshin Almaty qalasynyń ákimdigi men QTQJB arasynda kelisim jasaldy, aldyn ala jáne aralyq turǵyn úı qaryzdaryn berý úshin bankke bıýdjettik kredıt bólindi. Kredıt somasy 3 mlrd. teńgeni qurady. Baǵdarlamaǵa qatysýshylarǵa qoıylatyn negizgi talaptar: erli-zaıyptynyń jasy 35 jasqa deıin, Almatyda kem degende bir jyl turaqty tirkelýi, otbasynyń jeke baspanasynyń bolmaýy, Almatyda keminde alty aı jumys ótiliniń bolýy, qosymsha kepildik nemese QTQJB-da turǵyn úı qurylysy jınaqtarynyń bolýy. Kredıtteý mólsherlemesi jyldyq 5% quraıdy, merzimi 9 jylǵa deıin.

Budan basqa, qazirgi ýaqytta Holdıngtiń taǵy bir enshiles uıymy - Qazaqstannyń Damý Banki «Taiburyl» qoǵamdyq birlestigimen birlesip, Qazaqstandaǵy ınjınırıngtik jáne tehnıkalyq quzyretterdi nasıhattaýǵa jáne damytýǵa baǵyttalǵan «Kerek Adam» áleýmettik-bilim berý jobasyn iske asyrýda. Joba sheńberinde orta arnaıy jáne joǵary oqý oryndarynyń 3-4 kýrs stýdentteri men 2015-2018 jj. túlekteri elimizdiń iri kásiporyndarynda aqysy tólenetin taǵylymdamadan ótýde.

Jalpy alǵanda, «Báıterek» holdıngi jastardy qoldaýdyń qarjylyq jáne konsýltatsııalyq quraldarynan basqa, jastarǵa qatysty kadrlyq saıasatty júrgizedi. Holdıng qyzmetkerleriniń 17%-y 29 jasqa deıingi jas mamandar bolyp tabylady.

Holdıng pen onyń enshiles uıymdary jas qazaqstandyqtardy óz bıznesin júrgizý, jumys jáne turǵyn úı alý, sondaı-aq jańa perspektıvalyq jobalardy iske asyrý múmkindigin berý boıynsha belsendi túrde qoldaýdy odan ári de josparlaýda.