«Báıterek» holdıngi turaqty damý maqsattary úshin qandaı jumys atqarady
«Báıterek» basqarma tóraǵasy Qanat Sharlapaev holdıngtiń ınvestıtsııalyq jobalary turaqty damý maqsattaryna sáıkes keletinin aıtty.
«Qazaqstannyń Ortalyq Azııadaǵy róli erekshe. Qazirgi jaǵdaıǵa qarasaq, jetkizý tizbegi buzylǵan, logıstıka da aıtarlyqtaı ózgergen. Bul máseleler Úkimettiń de, jeke sektordyń da kún tártibindegi mańyzdy taqyrypqa aınalyp otyr. Árıne, Qazaqstan da bul máselelerdi talqylaýǵa nıetti. Turaqty damý maqsattaryna kelsek, munda úsh aspektini aıtý mańyzdy. Birinshiden, bul ekonomıkalyq ósý, ony áleýmettik progressiz, qorshaǵan ortany qorǵaýsyz damytý múmkin emes. «Báıterek» – Qazaqstannyń qarjy sektoryndaǵy iri agentterdiń biri. Biz tarazynyń bir jaǵyna turaqtylyq pen ekonomıkalyq damýdy, ekinshisine – áleýmettik jáne qorshaǵan ortany qorǵaý máselelerin qoıýymyz kerek», - dedi ol.
Aıtýynsha, holdıngte birqatar ınstıtýttar jáne klımattyq, ekonomıkalyq, áleýmettik faktorlardyń mańyzdy portfolıosy bar.
«Qurylys máseleleri, qoljetimdi jáne turaqty bolýy kerek turǵyn úı máseleleri barshamyzǵa mańyzdy taqyryp dep oılaımyn. Bizdiń enshiles uıymymyz «Otbasy bank» baspana alýǵa ıpoteka beredi jáne ol biz úshin óte mańyzdy qarjylyq oıynshy. Sondaı-aq «Báıterek» aıasynda shaǵyn jáne orta bıznespen jumys isteıtin «Damý» qory bar. Qor jumysynyń nátıjesinde elde ShOB sany byltyrǵy 33 %-dan 36 %-ǵa deıin artty», - dedi ol.
Frantsııalyq Rungis SEMMARIS International Market atqarýshy dırektory Benýa Jıýster Qazaqstannyń agrosalada úlken áleýeti bar ekenin, ózekti máseleler de joq emestigin aıtty.
«Qazaqstan jeriniń 75% aýysharýashylyq qyzmetke jaramdy, biraq tek 30% qoldanylýda. Sondyqtan muny «Báıterektiń» mańyzdy maqsaty dep senemin. Bizdiń OA-daǵy ókildigimiz bar jáne birqatar problemany anyqtadyq. Munda sý resýrstary, saýdany úıymdastyrý máseleleri bolýy yqtımal. Oǵan qosa, qoıma ınfraqurylymy, bazarlar, kólik qyzmetteri jetkiliksiz. Kedendegi qıyndyqtar, ákimshilik kedergiler de bar. Salada treıderler, kóterme saýdagerler jetispeýi múmkin jáne bul qyzmetti qazir kólik kompanııalary monopolııalap alǵan syndy. Saldarynan 30% deıingi azyq-túlik, kókónis shyǵynyn kórip otyrmyz. Eýropada mundaı shyǵyndar 5% aspaıdy. Jetkizý tizbegindegi jaǵdaıdyń nasharlyǵynan túpkilikti tutynýshyǵa ónim qymbat baǵada jáne tómen sapada jetedi», - dedi ol.
