«Báıterek» holdıngi men «Oıler Germes» agenttigi 1 mlrd eýroǵa kelisim jasasty
NUR-SULTAN. QazAqparat - «Báıterek» holdıngi men «Oıler Germes» halyqaralyq eksporttaý-saqtandyrý agenttigi arasynda 1 mlrd eýro somasyna kelisim jasaldy, dep habarlaıdy QazAqparat.
«Báıterek» ulttyq basqarýshy holdıngi» AQ Basqarma tóraǵasy Aıdar Áriphanov jáne «Oıler Germes» iri halyqaralyq eksporttaý-saqtandyrý agenttiginiń basshysy Ingo ıÝnker saqtandyrý sharttaryn jasasý lımıtin ashý týraly negizdemelik kelisimge qol qoıdy. Bul qujat Berlın qalasynda 2019 jylǵy 3 maýsymda ótken Germanııanyń Ekonomıka mınıstrligi men «Oıler Germes» agenttiginiń ókilderimen ótken kezdesý sheńberinde jasaldy.
Negizdemelik kelisim Qazaqstan Respýblıkasy atyna Germanııanyń eksporttyq operatsııalary úshin 1 mıllıard eýro kóleminde saqtandyrý kepildiginiń lımıtin (nemis tarapynan rastaý 2019 jylǵy 14 maýsymda kelip tústi) ashady.
«Báıterek» holdıngi «Oıler Germespen» ózara is-qımyl jasaý boıynsha Qazaqstannyń resmı operatory bolyp belgilendi. Lımıtti ashý el ekonomıkasyna nemis ınvestıtsııalaryn tartýǵa múmkindik beredi. Sondaı-aq qazaqstandyq kásipkerler men bankterdiń Germanııamen ǵana emes, búkil Eýropalyq odaqtyń elderimen birlesip jumys isteýine jańa múmkindikter beredi», - delingen aqparatta.
«Báıterek» ulttyq basqarýshy holdıngi» AQQazaqstan Respýblıkasy Prezıdentiniń 2013 jylǵy 22 mamyrdaǵy Jarlyǵyna sáıkes quryldy. Korporatıvtik basqarýdyń ozyq standarttaryna sáıkes keletin jáne ony ártaraptandyrý, ınnovatsııalardy qoldaý, eksportty damytý, eńbek ónimdiligin arttyrý arqyly Qazaqstan ekonomıkasynyń turaqty damýy boıynsha maqsattardy qamtamasyz etetin Qazaqstan Respýblıkasy Úkimetiniń negizgi ınstıtýty. Holdıng quramyna «Qazaqstannyń Damý Banki» AQ, «Qazaqstannyń ınvestıtsııalyq qory» AQ, «Qazaqstannyń Turǵyn úı qurylys jınaq banki» AQ, «Qazaqstandyq ıpotekalyq kompanııa» AQ, «KazakhExport» ESK» AQ, «Damý» KDQ» AQ, «QazTech Ventures» AQ, «Turǵyn úı qurylysyna kepildik berý qory» AQ, «Qazyna Kapıtal Menedjment» AQ, «Báıterek development» AQ, «Kazakhstan Project Preparation Fund» JShS kiredi.
«Oıler Germes»(Euler Hermes) - eksporttyq kredıtterdi saqtandyrýǵa mamandandyrylǵan álemdegi eń iri kompanııa bolyp tabylatyn saqtandyrý kompanııasy. Aktsııalarynyń kóbi Frantsýz saqtandyrýshysy Allianz France-qa tıesili, ol óz kezeginde eń iri nemis saqtandyrýshysy Allianz SE-ge tıesili. Kredıttik saqtandyrýmen aınalysa otyryp, 100 jyldan astam qarjylyq táýekelderden qorǵaýmen aınalysatyn Euler Hermes kompanııalardyń debıtorlyq bereshekterin basqarý úshin qyzmetterdiń tolyq spektrin ázirledi.
