«Báıterek» holdıngi men «Mubadala» arab qory ınfraqurylymdyq jobalarǵa kirispek
ASTANA. QazAqparat - Qazaqstan Prezıdenti Nursultan Nazarbaevtyń Birikken Arab Ámirlikterine sapary aıasynda «Báıterek» holdınginiń basqarma tóraǵasy Erbolat Dosaev aldyńǵy qatarly arab damý ınstıtýttary men qarjylyq uıymdarynyń basshylarymen kezdesti, dep habarlaıdy QazAqparat.
Holdıng baspasóz qyzmetiniń málimetinshe, uıymdastyrylǵan kezdesý barysynda E. Dosaev «Mubadala Development Company PJSC» ulttyq ál-aýqat qorynyń basshylyǵymen seriktestiktiń mán-jaıyn talqylady.
Taraptar Qazaqstan aýmaǵynda ınfraqurylymdyq jáne basqa da jobalardy birlesip qarjylandyrýdy qarastyratyn tıisti kelisimge qol qoıdy.
«Bizdiń birlesken bastamalardy ary qaraı damytý maqsatynda, ıaǵnı ınfraqurylymdyq jáne ındýstrıalyq jobalardy júzege asyrý baǵytynda ózara ınvestıtsııalyq tuǵyrnamany qurýdy josparlap otyrmyz»,-dedi «Báıterek» holdıngi basshysy.
Onyń paıymynsha, damýshy naryqtarda ınfraqurylymdyq jobalardy qarjylandyrý boıynsha «Mubadala» qorynyń baı tájirıbesi men otandyq ekonomıkany ártarapttandyrý turǵysynda «Báıterek» holdıngi kompanııalar tobynyń belsendi qyzmeti eki el arasyndaǵy saýda-ekonomıkalyq jáne ınvestıtsııalyq yntymaqtastyqty damytýǵa yqpal etedi.
