«Báıterek» holdıngi kompanııalar tobynyń aldaǵy 5 jylǵa arnalǵan jospary bekitildi
ASTANA. QazAqparat - Búgin QR Premer-Mınıstri Kárim Másimovtiń tóraǵalyǵymen «Báıterek» Ulttyq basqarýshy holdıngi» AQ Dırektorlar keńesiniń kezekti otyrysy ótti. Onda Dırektorlar keńesi «Báıterek» holdıngi kompanııalar tobynyń aldaǵy bes jylǵa arnalǵan josparyn bekitti. Bul týraly kompanııanyń baspasóz qyzmetinen habarlandy.
Dırektorlar keńesi múshelerine usynylǵan holdıng damýynyń josparyna saı, 5 jylda kompanııalar tobynyń aktıvi 1,9 trln. tengeden 4,1 trln., ıaǵnı 2,2 esege artady. Sonymen qatar, 2014-2018 jyldar aralyǵynda holdıng kompanııalar tobynyń aktıvterindegi nesıe jáne ınvestıtsııalyq portfel úlesi qazirgi 47 paıyzdan 77 paıyzǵa ulǵaımaq. Al holdıngtiń besjyldyq jıyntyq jospary boıynsha, tabys kólemi 2014 jylǵy 168 mlrd.teńgeden 2018 jyly 272 mlrd. teńgege, ıaǵnı 1,6 esege nemese 61% óspek. Qorytyndy jıyntyq tabys 2014 jyly 9,9 mlrd. teńge kóleminde josparlanǵan bolsa, ol 2018 jyly - 68 mlrd. teńgeni quraıtyn bolady.
«Kapıtaldyń rentabeldigi 2014 jylǵy 1,4%-den 2018 jyly 6,1%-ǵa artady. Óz kezeginde aktıvterdiń rentabeldigi 0,5% 1,7% ósetini kútiledi. Negizgi qarjy kózderine halyqaralyq jáne jergilikti kapıtal naryǵy, respýblıkalyq bıýdjet, Qazaqstan Ulttyq qory jáne «Qazaqstan turǵyn-úı qurylys jınaq banki» AQ tarapynan tartylǵan halyq depozıtteri qamtylyp otyr. Dırektorlar keńesinde usynylǵan josparǵa saı, respýblıkalyq bıýdjet pen Ulttyq qordan holdıngti qarjylandyrýǵa jumsalatyn qarjy kólemi birtindep azaıyp, 2017 jyly ol múldem toqtatylady. Kerisinshe, halyqaralyq jáne jergilikti naryqtan, Turǵyn úı qurylys jınaq bankiniń depozıtteri tarapynan tartylatyn qarjy kóbeıe túspek», - delingen baspasóz baıanynda. Sonymen birge, otyrysta «Báıterek» holdınginiń Investıtsııalyq saıasaty da bekitildi. Onyń maqsaty Holdıng pen onyń barlyq enshiles kásiporyndaryndaǵy ınvestıtsıalyq qyzmetti meılinshe tıimdi, ári ashyq túrde júrgizýge arnalǵan. «Báıterek» holdıngi jıyn barysynda Ujymdyq basqarý kodeksimen qatar holdıngtiń jarǵysyn, sondaı aq, 2014-2016 jyldarǵa arnalǵan basqarma tóraǵasy, basqarma tóraǵasynyń orynbasarlary, basqarma músheleri qyzmetiniń negizgi baǵyttaryn anyqtaıtyn kartany da bekitti.
