«Báıterek» holdıngi kásipkerlerdi memlekettik qoldaýǵa júginýden qoryqpaýǵa shaqyrdy
«Shaǵyn bıznesti memlekettik qoldaýdyń suranysqa ıe taǵy bir sharasy – «Damý» qory beretin kepildik. Kásipker óz bıznesin ashýǵa nemese keńeıtýge kredıt alatyn kezde kepilzaty jetkiliksiz bolǵanda osy kepildikti paıdalana alady. 2020 jylǵy 1 tamyzdaǵy jaǵdaı boıynsha kredıt somasy 306 mıllıard teńge bolatyn 7 518 joba boıynsha kepildikter berildi. Kepildikter somasy 117 mıllıard teńgeni qurady. Onyń ishinde 2019 jyly jalpy kredıt somasy 74 mıllıard teńge bolatyn 1 726 jobaǵa qoldaý kórsetildi, kepildik somasy 27 mıllıard teńgege jetti», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń málimetinshe, sala boıynsha bólgende qarjylandyrylǵan jobalar arasynda óńdeý ónerkásibiniń (jalpy kredıt somasy 103 mıllıard teńge bolatyn 2 206 joba) jáne saýda salasynyń (kredıt somasy 32 mıllıard teńge bolatyn 1 309 joba) úlesi kóp. Óńirler arasynda Aqtóbe (jalpy kredıt somasy 20 mıllıard teńge bolatyn 582 joba) jáne Pavlodar (jalpy kredıt somasy 21 mıllıard teńge bolatyn 535 joba) oblystary kósh bastap tur.
«Baǵdarlamanyń tıimdiligin kórsetetin basqa da sandarǵa da toqtalǵym keledi. Máselen, baǵdarlamaǵa qatysýshy kásipkerler 2010-2019 jyldary 25 trıllıon teńgeniń ónimin shyǵardy, 1,6 trıllıon teńge somasynda salyq tóledi. BJK aıasynda memlekettik qoldaýǵa ıe bolǵan kásipkerlerdiń arqasynda 100 myńnan astam jańa jumys orny ashyldy. Eger mýltıplıkatıvti áseri týraly aıtatyn bolsaq, 1 teńge sýbsıdııaǵa 10 teńge kredıt tartyldy. Onǵa bir – bul qarjy ınstıtýttary turǵysynan óte jaqsy kórsetkish. 1 teńge kepildikke 2,6 teńgege jýyq kredıt qarajaty tartyldy. Sonymen qatar, nátıje kórsetip otyrǵandaı, 1 teńge sýbsıdııa 135 teńge paıda jáne bıýdjetke 8 teńge salyqtyq túsim ákeledi», - dedi Rýstam Qaraǵoıshın.
Basqarma tóraǵasynyń aıtýynsha, 2020 jyldyń 1 qańtarynan bastap «Bıznestiń jol kartasy» taǵy bes jylǵa, ıaǵnı 2025 jylǵa deıin uzartyldy. Qazir oǵan edáýir ózgerister engizildi. Olar bıznestiń qarjylandyrý alýyn sózsiz jeńildetedi.
«Osy tusta aıta ketetini, buǵan QR Ulttyq ekonomıka mınıstrliginiń úılesimdi, jedel jáne joǵary deńgeıdegi kásibı jumysynyń arqasynda qol jetkizildi. Osylaısha, sýbsıdııalaý quraly boıynsha: salalyq shekteýler joıyldy; kásipkerlerge arnalǵan mólsherleme 6 paıyz deńgeıinde birkelkilendi; sýbsıdııalanatyn kredıt somasy 2,5 mıllıardtan 7 mıllıard teńgege deıin ulǵaıtyldy, al merzimi 5 jylǵa uzartyldy. Kepildik berý quraly boıynsha kásibin jańa bastaǵan kásipkerdiń 360 mıllıon teńgege deıingi kredıtine kepildik beriledi. Bul rette, kredıt somasynyń 85 paıyzy kepildendiriledi. Al kásibin júrgizip jatqan kásipkerdiń 1 mıllıardqa deıingi kredıtine kepildik usynylady. Bul rette, kredıt somasynyń 50 paıyzyna kepildik beriledi. 500 mıllıon teńgege deıingi aınalym qarajatyn 100 paıyz tolyqtyrýdy kózdeıtin kredıtterge de kepildik bar. Sondaı-aq, salalyq shekteýler joıyldy», - dedi ol.
Rýstam Qaraǵoıshınniń atap ótýinshe, jańa «BJK-2025» baǵdarlamasyna tamaq ónimderin, sabyn men jýǵysh zattardy, sanıtarlyq-gıgıenalyq maqsattaǵy qaǵaz buıymdaryn óndirý, avtomobıl kóligimen júk tasymaldaý, qoıma sharýashylyǵy jáne qosalqy kólik qyzmeti, týrızm, jalǵa alý jáne menshikti nemese jalǵa alynǵan jyljymaıtyn múlikti basqarý syndy salalardaǵy iri bıznes sýbektileri engizilgen.
«Bizdiń aldymyzda kásipkerler sanyn arttyrý mindeti tur. Qazir eldiń jalpy ishki ónimindegi shaǵyn jáne orta bıznestiń úlesi 30,8 paıyzdy quraıdy. Al 2025 jylǵa qaraı bul kórsetkish 35 paıyzǵa deıin ósýi tıis. Biz bes jyl ishinde osyndaı úlken serpindi kútýdemiz. Sondyqtan kásipkerlerimizdi jeke bıznesin ashý nemese damytý úshin memlekettik qoldaýǵa júginýden qoryqpaýǵa shaqyramyn», - dedi Rýstam Qaraǵoıshın.
