«Báıterek» holdıngi enshiles uıymdardyń sanyn qysqartty
NUR-SULTAN. QazAqparat - «Báıterek» ulttyq basqarýshy holdıngi» AQ qurylymy ońtaılandyryldy. Bul málimetti Ulttyq ekonomıka mınıstrligi jarııalady, dep habarlaıdy QazAqparat.
«Memleket basshysynyń tapsyrmasyn oryndaý sheńberinde «Báıterek» UBH» AQ 25 shildede «QazAgroQarjy» AQ (QAQ) aktsııalarynyń 100%-yn «Agrarlyq nesıe korporatsııasy» AQ-ǵa (ANK) berdi. «Báıterek» UBH» AQ enshiles kompanııalarynyń jalpy sany 7-ge deıin qysqartyldy.
QAQ ANK-niń enshiles kompanııasyna aınalyp, aýyl sharýashylyǵy tehnıkasy men jabdyqtaryn lızıngke berý boıynsha óziniń negizgi qyzmetin jalǵastyrady. Júrgizilgen uıymdastyrýshylyq ózgerister QAQ-tyń qazirgi klıentterine jáne iske asyrylatyn lızıngtik baǵdarlamalardyń sharttaryna áser etpeıdi», - delingen mınıstrlik habarlamasynda.
