«Báıterek» holdıngi 2015 jyldyń qorytyndysy boıynsha jaldamaly baspana josparyn 6,6 paıyzǵa asyra oryndady
ASTANA. QazAqparat - Bıyl «Báıterek» Ulttyq basqarý holdıngi «Nurly jol» memlekettik baǵdarlamasynyń halyqtyń áleýmettik álsiz toptary úshin jaldamaly turǵyn úı salý baǵytyn iske asyrýdy alǵash ret qolǵa aldy.
Aǵymdaǵy jyldyń qorytyndylary boıynsha «Báıterek» holdıngi turǵyn úıdi engizý jónindegi bıylǵa belgilengen jospardy 6,6 paıyzǵa asyra oryndady. Bul týraly kompanııanyń baspasóz qyzmetinen habarlandy.
Atap aıtqanda, Óńirlerdi damytýdyń 2020 jylǵa deıingi baǵdarlamasyna sáıkes «Báıterek» holdıngi 2015 jyly Qazaqstan boıynsha 401 myń sharshy metrdi nemese shamamen 7 myń páterdi paıdalanýǵa tapsyrý týraly mindet alǵan bolatyn. Búgingi kúni turǵyn úıdiń 416,8 myń sharshy metri nemese 7 062 páteri paıdalanýǵa berildi.
«Qosymsha jyl sońyna deıin taǵy da 10,7 myń sharshy metrdi nemese 175 páterdi tapsyrý josparlanyp otyr. Osylaısha, 2015 jyly barlyǵy 427,5 myń sharshy metr nemese 7 237 páter paıdalanýǵa berilip, turǵyn úıdi engizý jónindegi bıylǵy mindet 6,6%-ǵa asyra oryndalady», - delingen baspasóz baıanynda.
Sonymen qatar, qazirgi ýaqyttaǵy jaǵdaıy boıynsha óńirlerdegi qalalarda jaldamaly turǵyn úıdi engizý qamtamasyz etý kórsetkishteri tómendegideı bolyp otyr Astana (aýmaǵy 23 myń sharshy metrlik 394 páter), Almaty (aýmaǵy 111,5 myń sharshy metrlik 1885 páter), Shymkent ( 85,9 myń sharshy metrlik 1572 páter), Aqtóbe (31,3 myń sharshy metrlik 478 páter),Taraz ( 28,5 myń sharshy metrlik 450 páter), Qaraǵandy (10 myń sharshy metrlik 152 páter), Qostanaı ( 5,5 myń sharshy metrlik 91 páter),Semeı ( 9,5 myń sharshy metrlik 192 páter), Qyzylorda ( 59,6 myń sharshy metrlik 950 páter), Taldyqorǵan (1,7 myń sharshy metrlik 30 páter), Pavlodar ( 10,6 myń sharshy metrlik 215 páter), Aqtaý (19,4 myń sharshy metrlik 316 páter), Kókshetaý (19,9 myń sharshy metrlik 337 páter).
Budan bólek, jyl sońyna deıin Óskemen qalasynda aýmaǵy 7,8 myń sharshy metrdi quraıtyn 140 páter jáne Qostanaı qalasynda aýmaǵy 2,8 myń sharshy metr 35 páter tapsyrylatyn bolady. Jaldamaly páterlerdi jergilikti atqarýshy organdarda kezekte turǵan azamattar sanattary, jas otbasylar, bıýdjettik uıymdardyń qyzmetkerleri, memlekettik qyzmetshiler, kóp balaly otbasylar, múgedek balalary bar otbasylar, jetim balalar, ata-anasynyń qamqorlyǵynsyz qalǵan balalar, tolyq emes otbasylar, áskerı qyzmetshiler alýda.
Esterińizge sala keteıik, Memleket basshysy 2014 jylǵy qarashadaǵy «Nurly jol - Bolashaqqa bastar jol» atty Qazaqstan halqyna Joldaýynda qoljetimdi úı salý tásilderin qaıta qaraýdy jáne qazaqstandyqtardy qoljetimdi, sapaly ári arzan baspanamen qamtamasyz etýdi tapsyrǵan bolatyn.
