«Báıterek» holdıngi 200 mlrd teńgege oblıgatsııalyq nesıe tartady

NUR-SULTAN. QazAqparat – «Báıterek» ulttyq basqarýshy holdıngi 10 jyl merzimge 200 mlrd teńge oblıgatsııalyq nesıe tartyp, ony óziniń enshiles kásiporyndary arqyly taratady, dep habarlaıdy QazAqparat tilshisi.

Úkimet otyrysynda «Báıterek» ulttyq basqarýshy holdınginiń basqarma tóraǵasy Aıdar Áriphanov qarajat qandaı shartpen tartylatynyn túsindirdi.

«Biz Ulttyq banktiń qarajatynan óteý merzimi 10 jyl jáne syıaqy mólsherlemesi jyldyq 7 paıyzben 200 mlrd teńge kóleminde oblıgatsııalyq nesıe tartýdy josparlap otyrmyz. Holdıngtiń oblıgatsııalaryn ornalastyrýdan túsken qarajat mynadaı baǵyttar boıynsha jumsalady. 100 mlrd teńge Qazaqstan turǵyn úı kopanııasy arqyly ákimdikterdi qarjylandyrýǵa, 7,1 paıyzy, onyń ishinde 2 mlrd teńge azamattardyń ómir súrý sapasyn jaqsartý úshin ınfraqurylymdy damytýǵa jáne 50 mlrd teńge bıznesti damytýǵa baǵyttalady», - deıdi Aıdar Áriphanov.

Holdıng basshysynyń aıtýynsha, qalǵan 100 mlrd teńge agroónerkásiptik keshenniń ınvestıtsııalyq jobalaryna baǵyttalmaq.

«Holdıngtiń enshiles uıymdary arqyly qarjylandyrýǵa «Agrarlyq nesıe korporatsııasyna – 34,1 mlrd teńge, Qazaqstannyń damý bankine – 32,2 mlrd teńge, «Qazyna Kapıtal Menedjmentke» – 33,7 mlrd teńge kóleminde bólinetin bolady», - dedi holdıngtiń basqarma tóraǵasy.