«Báıterek» holdıngi memlekettik jobalarǵa 1 trln teńge qarjy bóledi
ASTANA. KAZINFORM — Qarjy mınıstri Mádı Takıev elimizdiń aldaǵy jylǵa shyǵys kólemi men baǵytyn ajyratyp berdi.
— Óńirlerdiń damýyna tikeleı áser etetin jalpy memlekettik jobalarǵa, «Báıterek» ulttyq basqarýshy holdıngi» aktsıonerlik qoǵamy arqyly 1 trln teńge mólsherinde qarajat bólý josparlanyp otyr. Áleýmettik sala boıynsha shyǵys 10 trln 725 mlrd teńgeni qurady. Áleýmettik tólemdi 10%-ǵa ındeksteý (ınflıatsııanyń ortasha deńgeıi) jáne zeınetaqy men járdemaqy alýshylardyń 288 myń adamǵa óskenin eskergen jón. Mindetti áleýmettik medıtsınalyq saqtandyrý jarnasyn esepteý úshin, medıanalyq jalaqy qoldanyldy. Sonymen qatar, stıpendııany kóterýge, bilim alýshylar kontıngentin 19 392 adamǵa ulǵaıtýǵa jumsalatyn shyǵys ta bar, — dedi Mádı Takıev Úkimet otyrysynda.
Odan ári Qarjy mınıstri ekonomıkanyń naqty sektoryn qoldaýǵa arnalǵan shyǵysqa toqtaldy.
— 2026 jyly baǵyttaǵy shyǵys 3 trln 626 mlrd teńgeni qurap, óndiristi, eksportty jáne kásipkerlikti yntalandyrý sharasyn keńeıtý esebinen qamtamasyz etiledi. Agrarlyq ónerkásiptik keshenge, sýbsıdııalaý, saqtaý jáne qaıta óńdeý ınfraqurylymyn damytýdy qosa alǵanda, 732 mlrd teńge qarastyrylǵan. Qarajat azyq-túlik qaýipsizdigin qamtamasyz etýge jáne salany tehnologııalyq jańartýǵa baǵyttalady, — deıdi vedomstvo basshysy.
Buǵan deıin Qarjy mınıstri 2026 jyly bıýdjet shyǵysy 2 trln teńgege ulǵaıatynyn jáne onyń sebebin túsindirgen edi.
Aıta ketsek, Úkimet basshysy memlekettik bıýdjet shyǵynyn qatań baqylaýda ustaýdy mindettep otyr.