«Báıterek» holdıngi elde bıznesti qoldaýdyń jańa tetigin iske qosyp jatyr
ASTANA. KAZINFORM — «Báıterek» UIH» AQ Basqarma tóraǵasy Rýstam Karagoıshın bıznesti qoldaýdyń biryńǵaı front-keńselerine qatysty túsinik berdi.
Onyń aıtýynsha, holdıng shaǵyn jáne orta bıznesti qoldaýdyń keshendi ekojúıesin qalyptastyryp keledi. Osy baǵytta kepildendirý, sýbsıdııalaý jáne jeńildetilgen qarjylandyrý quraldary arqyly 2026 jyly shamamen 3 trln teńge baǵyttaý josparlanyp otyr.
Negizgi basymdyq kásipkerler úshin qarjylandyrýdyń qoljetimdiligin arttyrýǵa, bıznesti ashý men damytý múmkindikterin keńeıtýge, sondaı-aq jumys istep turǵan kásiporyndardy jańǵyrtýǵa berilip otyr.
- Shaǵyn jáne orta bıznesti damytý - mańyzdy basymdyqtardyń biri. Sebebi bul sektor ekonomıkalyq belsendilikti arttyryp, jańa jumys oryndaryn qurýǵa jáne óńirler ekonomıkasyn damytýǵa yqpal etedi, - dedi Karagoıshın Parlament palatalarynyń birlesken otyrysynan keıin.
Osyǵan baılanysty bıznesti qoldaýdyń qarjylyq jáne qarjylyq emes sharalaryn, sondaı-aq «bir tereze» qaǵıdaty boıynsha qyzmetterdi qamtıtyn keshendi ekojúıeni damytý jalǵasyp jatyr. Mysaly, Ónerkásipti damytý qorynyń jabdyqtardy jańartý boıynsha modernızatsııa baǵdarlamasy «Damý» qorynyń biryńǵaı front-ofısteri arqyly júzege asyrylady. Sonymen qatar, holdıng bıyl «Órleý-lızıng» baǵdarlamasyn iske qosty, al ótinimder 10 jumys kúni ishinde qaralady.
Sonymen qatar R. Karagoıshın holdıng qyzmetiniń nátıjesinde 2025 jyly barlyq baǵyttar boıynsha jalpy qarjylandyrý kólemi 10,4 trln teńgeni quraǵanyn aıtty. Osynyń nátıjesinde:
- 77 iri joba qarjylandyryldy;
- shaǵyn jáne orta bıznestiń 27,4 myń jobasyna, 131 eksporttaýshynyń jobalaryna qoldaý jasaldy;
- kóktemgi egis jumystarynda 7,2 myń fermerge qoldaý kórsetildi;
- 11,4 myń aýyl sharýashylyǵy tehnıkasy lızıngke berildi;
- 77,5 myń otbasy, onyń ishinde kezekte turǵan 11,6 myń azamat baspanamen qamtyldy.
2026 jyly holdıng ekonomıkanyń naqty sektoryn qarjylandyrý kólemin 8 trln teńge deńgeıinde saqtaıdy. Onyń ishinde 3,9 trln teńge holdıng tarapynan iri ınvestıtsııalyq jobalardy tikeleı qarjylandyrýǵa baǵyttalǵan. Al 4,1 trln teńge – kepildendirý, saqtandyrý, sýbsıdııalaý men shartty qarjylandyrý quraldary arqyly qarastyrylǵan. Onyń shamamen 50 paıyzdan astamy ekinshi deńgeıli bankter arqyly baǵyttalady.
Bıyldyń birinshi toqsanynyń qorytyndysy boıynsha holdıngtiń jınaqtalǵan tikeleı qoldaý nesıe portfeli 7,7 trln teńgeni qurady. Bul – ekonomıkany nesıeleýdiń jalpy kóleminiń shamamen 14 paıyzy.
