«Báıterek» halyqaralyq medıa-ortalyǵynda ótken baspasóz máslıhaty tanymal skrıpkashy M. Bısenǵalıevtyń shyǵarmashylyq keshine arnaldy
ASTANA. 6 jeltoqsan. QazAqparat - Búgin «Báıterek» halyqaralyq medıa-ortalyǵynda tanymal qazaqstandyq skrıpkashy Marat Bısenǵalıevtyń mereıtoılyq shyǵarmashylyq keshine arnalǵan baspasóz máslıhaty ótti.
Oǵan Marat Bısengalıev, Astana qalasy fılarmonııasy sımfonııalyq orkestriniń dırıjeri Abzal Mýhıtdınov qatysty.
Aıta ketsek, Marat Bısengalıevtyń 50-jyldyq mereıtoıyna arnalǵan kontsert 7 jeltoqsanda saǵat 19.00-de «Qazaqstan» OKZ-ynda ótedi.
Shyǵarmashylyq kesh baǵdarlamasy shetelde Qazaqstan ımıdjin qalyptastyrýǵa bar kúsh-jigerin jumsap júrgen Marat Bısenǵalıevtyń oryndaǵan ánderinen turady. Olardyń qataryna Eýropa men Amerıkanyń úzdik zaldarynyń sahnasynda shyrqalǵan klassıkalyq týyndylar jeterlik.
Keshte jeke pesalarmen qosa Karl Djenkınstiń «Shákárim» men «Tlep» (Elegııa, Zagıpa, Bıı), «Kontsert dlıa skrıpkı s orkestrom» jáne Almas Serkebaevtyń «Maratqa arnalǵan kúı» mýzykalyq shyǵarmalarynyń jeke bólikteri de shyrqalady.
Skrıpkashynyń aldaǵy jospary - Eýropadaǵy kontserttik týrnege kelisimshartqa jáne «Doıche Grammofonda» jazba jumystaryn júrgizýge qol jetkizgen, ózi qaıta qurǵan Almaty sımfonııalyq orkestriniń tusaýyn kesý.
