«Báıterek» ǵarysh keshenin qurý: Senatta Reseımen kelisimniń sharttary qaraldy

NUR-SULTAN. QazAqparat – QR Parlamentiniń Senatynda Reseı Federatsııasymen birlesip «Báıterek» ǵarysh zymyran keshenin qurý boıynsha kelisimge túzetýler engizý máselesi qaraldy, dep habarlaıdy QazAqparat.

«SenattyńHalyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Qazaqstan Respýblıkasy Zańynyń jobasy qaraldy. Zań jobasy joǵaryda atalǵan Kelisimge «Báıterek» ǵarysh zymyran kesheninen ǵarysh apparattaryn ushyrýdy júzege asyrý úshin keshendi qurý men birlesip paıdalaný jáne Qazaqstan men Reseı taraptary arasynda jobany iske asyrýdy qarjylandyrýdy bólý kezinde negizgi sharttardy ózektendirý bóliginde túzetýler engizý týraly Hattamany ratıfıkatsııalaýdy kózdeıdi», - dedi palatanyń baspasóz qyzmetinen.

Osyǵan baılanysty Hattamamen: jobada tasymaldaǵysh zymyrandy («Angara» tasymaldaǵysh zymyranyn perspektıvaly reseılik orta klasty tasymaldaǵysh zymyranǵa), sondaı-aq «Baıqońyr» ǵarysh aılaǵynyń jaldaýynan shyǵarylatyn «Zenıt-M» ǵarysh zymyran kesheniniń bazasyndaǵy qurylys ornyn aýystyrý kózdeledi; Taraptar arasynda ǵarysh zymyran kesheniniń quramdas bólikterin qarjylandyrýdy bólý kózdeledi, oǵan sáıkes Reseı tarapy tasymaldaǵysh zymyrandy qurýdy jáne onyń quramdas bólikterin tasymaldaý quraldaryn, ekpindetkish bloktyń, ǵarysh apparatynyń jáne ǵaryshtyq basty bóliktiń tehnıkalyq keshenin jańǵyrtýdy qarjylandyrýdy qamtamasyz etedi, al Qazaqstan tarapy «Zenıt-M» ǵarysh zymyran kesheniniń qolda bar jerústi ınfraqurylymyn

rekonstrýktsııalaýdy jáne jańǵyrtýdy, starttyq jáne tehnıkalyq keshenderdi paıdalaný boıynsha personaldy daıyndaýdyń oqý-jattyǵý quraldaryn qurýdy qarjylandyrýdy qamtamasyz etedi; buǵan deıin joǵaryda atalǵan Kelisimde aıqyndalmaǵan, orta klasty tasymaldaǵysh zymyranmen «Báıterek» ǵarysh zymyran kesheninde ushý synaqtarynyń bastalý merzimin 2020 jyly bastaý jáne taǵy basqalar kózdelgen.

Halyqaralyq qatynastar, qorǵanys jáne qaýipsizdik komıtetiniń múshesi Talǵat Musabaev óz baıandamasynda «Báıterek» ǵarysh zymyran keshenin qurý Qazaqstanǵa jerústi ǵarysh ınfraqurylymnyń menshikti obektilerin paıdalana otyryp, ushyrý qyzmetin júzege asyratyn memleket bolýǵa, keshendi qurý jáne paıdalaný kezinde jańa jumys oryndaryn ashý sııaqty áleýmettik oń áserlerge qol jetkizýge múmkindik beretinin atap ótti.

«Baıqońyr» ǵarysh aılaǵy obektileri bazasynda ǵarysh qyzmeti salasynda bilikti kadrlardy daıarlaıtyn óz ortalyǵyn qurý múmkindigi paıda bolady», - dedi senator.

Qujat palata qaraýyna berildi.