«Báıterek» ǵarysh keshenindegi synaqtardy keıinge shegerýge negiz joq - Aıdyn Aıymbetov
ASTANA. KAZINFORM — QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev jeltoqsanda «Báıterek» ǵarysh keshenindegi synaq jumystaryna túsinik berdi.
Atap aıtqanda, búgin Parlament Májilisiniń jalpy otyrysynda «2004 jylǵy 22 jeltoqsandaǵy Qazaqstan Úkimeti men Reseı Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» zańy qabyldandy.
- «Soıýz-5» - «Báıterek» keshenine arnalyp jasalǵan jalǵyz zymyran-tasyǵyshy. Eger sheteldik kompanııalardan ózderiniń spýtnıkterin ushyrýǵa suranys bolsa, bizde olarǵa tıisti jaǵdaı jasaýǵa múmkindik bolady. 2025 jylǵy jeltoqsanda «Báıterek» kesheninde birinshi synaq júzege asyrylady. 2026 jyly onda taǵy bir ushyrylym josparlanǵan. Jalpy, osyndaı úsh synaq bolýy kerek. Bizdiń jobada reseılik tapsyrystan bólek, naryqta basqa da klıentterdi tartý eskerilgen. Ol keshende sońǵy synaq 2027 jyly ótetinin eskersek, 2028 jyldan bastap kommertsııalyq negizde halyqaralyq naryqtarǵa shyǵamyz, - dedi J.Mádıev Parlament Májilisinde tilshiler suraǵyna jaýap bere otyryp.
Sonymen qatar «Báıterek» BQ» AQ-nyń Basqarma tóraǵasy Aıdyn Aıymbetov «Báıterek» kesheninen «Soıýz-5» zymyran-tasyǵyshynyń alǵashqy ushyrylymy jyl sońyna josparlanǵanyn rastady.
- Qurylys jospar boıynsha iske asyp keledi, ıaǵnı jumys kestesinen aýytqý joq. Osy oraıda bıylǵy jeltoqsanda ushyrý josparlanǵan. Zymyran-tasyǵyshty quryp jatqan Reseı jaǵy da osyny rastady. Jerústi ınfraqurylymnyń daıyndalyp jatqanyn eskersek, atalǵan ushyrylymdy keıinge shegerýge negiz joq dep sanaımyn, - dedi A.Aıymbetov.
Buǵan deıin Aıdyn Aıymbetov kelesi qazaq ǵaryshkeri ǵaryshtyń ǵylymı baǵdarlamasy daıyn bolǵanda shyǵatynyn aıtty.