«Báıterek» eksportty qoldaý men ınvestıtsııa tartýdy kúsheıtedi
ASTANA. KAZINFORM – «Báıterek» holdınginiń dırektorlar keńesinde ekonomıkanyń naqty sektoryn qarjylandyrýdy keńeıtý jónindegi sheshimder qabyldandy. Bul týraly Úkimettiń baspasóz qyzmeti habarlady.
Premer-mınıstr Oljas Bektenov «Báıterek» ulttyq ınvestıtsııalyq holdıngi» AQ dırektorlar keńesiniń otyrysyn ótkizdi.
Investıtsııalyq jáne ınfraqurylymdyq jobalardy júzege asyrý úshin qarjylandyrý tartý, shıkizattyq emes eksportty damytý, sondaı-aq ekonomıkanyń naqty sektoryn memlekettik qoldaý sharalarynyń tıimdiligin arttyrý máseleleri qaraldy.
Memleket basshysynyń ekonomıkany qarjylandyrýdy qamtamasyz etý jónindegi tapsyrmalaryn oryndaý aıasynda dırektorlar keńesi holdıngtiń resýrstyq bazasyn keńeıtýge jáne basym salalardy qoldaýdy arttyrýǵa baǵyttalǵan birqatar sheshim qabyldady.
Otandyq eksporttaýshylardy qoldaýǵa basa nazar aýdaryldy. Dırektorlar keńesi Qazaqstannyń eksporttyq-kredıttik agenttiginiń Qazaqstan Respýblıkasynyń 250 mlrd teńge mólsherindegi memlekettik kepildigin 10 jyl merzimge alý úshin ózara baılanysty mámileler jasaýyn maquldady. Bul sheshimdi júzege asyrý agenttiktiń saqtandyrý jáne kepildik berý áleýetin arttyrýǵa, shıkizattyq emes eksportty qoldaý quraldaryn keńeıtýge jáne bıznestiń eksporttyq qarjylandyrýǵa qoljetimdiligin arttyrýǵa múmkindik beredi. 2026 jyldyń qorytyndysy boıynsha agenttiktiń saqtandyrý jáne kepildik mindettemeler portfeli 1,2 trln teńgege jetedi dep kútilýde.
«Báıterek» holdıngin ornyqty damytý jónindegi 2026-2028 jyldarǵa arnalǵan is-sharalar jospary bekitildi. Qujat «jasyl» jáne turaqty qarjylandyrý quraldaryn jetildirýdi, tómen kómirtekti ósýge yqpal etetin jobalardy qoldaýdy, ESG-táýekelderdi basqarý tıimdiligin, korporatıvtik basqarýdyń ashyqtyǵy men sapasyn arttyrýdy kózdeıdi. Basymdyqtardyń qatarynda áleýmettik bastamalardy júzege asyrý, kadr saıasatyn jetildirý jáne úzdik halyqaralyq ESG-tájirıbelerdi engizý de bar. Qazirgi ýaqytta holdıng BUU-nyń turaqty damýynyń 17 maqsatynyń 15-in eskeredi jáne tıisti prıntsıpterdi kompanııalar tobynyń jumysyna dáıekti túrde biriktiredi. 2025 jyldyń qorytyndysy boıynsha Sustainable Fitch halyqaralyq reıtıngtik agenttigi holdıngtiń turaqty damý salasyndaǵy úzdik álemdik standarttarǵa sáıkestigin rastaı otyryp, holdıngtiń ESG-reıtıngin «3» deńgeıinen «2» deńgeıine deıin kóterdi.
Otyrys qorytyndysynda Táýekelder boıynsha shoǵyrlandyrylǵan esep, Іshki aýdıt qyzmetiniń esebi jáne Sybaılas jemqorlyqqa qarsy komplaens-qyzmettiń 2026 jylǵy I toqsandaǵy esebi bekitildi.
2026 jyldyń basynan beri ekonomıkany 8 trln teńgege qarjylandyrý boıynsha mindetterdi júzege asyrý sheńberinde holdıng bızneske jalpy somasy 3 trln teńgege qoldaý kórsetti. Onyń ishinde shamamen 875 mlrd teńgege shaǵyn jáne orta bıznestiń 2 975 jobasyna qoldaý kórsetildi. Agroónerkásip keshenin damytýǵa shamamen 685 mlrd teńge baǵyttaldy, bul 5,2 myń aýyl sharýashylyǵy taýaryn óndirýshilerdi qoldaýǵa múmkindik berdi. Іri bızneske 380 jobany qamtıtyn qarjy bólindi.
Qazaqstan Investment Corporation jelisi boıynsha 51,5 mlrd teńgege 5 ınvestıtsııalyq joba qarjylandyryldy, eksportty qoldaý sheńberinde Qazaqstannyń eksporttyq-kredıttik agenttigi 54 otandyq eksporttaýshyny qoldaý úshin 293,5 mlrd teńge baǵyttady.
Osylaısha, holdıng kásipkerliktiń damýyna, óndiristi jańǵyrtýǵa, eksporttyń ósýine jáne el ekonomıkasynyń nyǵaıýyna yqpal ete otyryp, bıznestiń qarjy quraldaryna qoljetimdiligin qamtamasyz etýdi jalǵastyrýda.
Aıta ketelik «Báıterek» ulttyq ınvestıtsııalyq holdıngi Gonkongtiń iskerlik delegatsııasymen kezdesý ótkizgen edi.
